Tribu Kandaya moapil sa Aliwan Festival

NAGTINGUHA karon ang kam­piyon sa Free Interpretation Category sa Sinulog 2018 ritual showdown nga mao ang Tribu Kandaya sa lungsod sa Daanbantayan nga mosalmot sa Aliwan Festival sa Kauluhan.

Samtang nagplano usab ang Kapitolyo sa paghatag og pagpasidungog sa maong grupo ug sa uban pang contingent gikan sa probinsiya sa Sugbo nga nakadaog sa Sinulog.

Si Barry Luchie, choreographer, mibutyag nga niadtong 2013 ang katapusang pagsalmot sa Tribu Kandaya sa Sinulog Grand Parade ug ning tuiga lang usab sila nakakabalik. Sa tuig 2003 naangkon nila ang kampeyonato sa Sinulog grand showdown.

Niadtong Dominggo ilang gipakita ang ilang kahanas ug ang ilang paspas nga lihok ug mabulokon nga mga costume maoy usa sa nahimong sentro sa atraksiyon ug naghatag og dalan sa paglangkat sa titulo sa Free Interpretation category.

Ila usab naangkon ang 3rd runner up honor sa festival queen competition.

Plano karon sa Tribu Kandaya nga mosalmot sa mga dakong kompetisyon sa nagkadaiyang festival sa nasud sama sa Aliwan Festival sa Kauluhan.

Si Board Member Sun Shimura sa 4th district ug kanhi mayor sa Daanbantayan, miingon nga usa na usab kini sa mga damgo nga ilang gipaninguha nga maangkon karong tuiga. Apan samtang wala pa moabot ang adlaw sa Aliwan Festival, buot una ni Shimura nga tagamtamon sa mga taga-Daanbantayan ang ilang kadaugan.

Lakip usab sa mga mananaog ang Carcar City Division nga champion sa Sinulog Based category, Talisay City Central School, 3rd place sa susamang category, ug 4th ang Municipality of Tuburan.

Si Bokal Shimura ni-sponsor sab og resolusyon alang sa pag-ila sa choreographer nga si Luche ug sa ilang festival queen nga si Isabel Luche.

Matod ni Gob. Hilario Davide III, hatagan ug premyo sa provincial government ang mga mananaog.

Ang Tribu Kandaya maoy bugtong contingent gikan sa probinsiya sa Sugbo, nga nakadaog sa Free Interpretation Categroy. Naangkon sab nila ang Best in Musicality ug Best in Costume.

Nasulod sab hinuon sa maong kategoriya ang garbo sa dakbayan sa Sugbo nga Lumad Basakanon sa brgy. Basak San Nicolas. (AZDL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph