GIUNHAN sa Basak Lapu-Lapu City Jeepney Operators and Drivers Association, Inc., (BALACJODA) ang ubang transport group sa pagsang-at og petisyon aron pasak-an ang minimum nga pletehan sa Central Visayas.
Ang BALACJODA nisumiter na sa ilang giamendahan nga petisyon niadtong Biyernes, Enero 19 sa buhatan sa Land Transportation Franchising and Regulatory Board (LTFRB) 7.
Subay gihapon ang maong petisyon sa excise tax sa produkto sa petrolyo ubos sa Tax Reform for Accelaration and Inclusion (TRAIN) Law.
Sa ilang petisyon pinaagi sa ilang presidente nga si Alexander Dometita sila nisaysay nga niadto pang Abril 20, 2017 dihang nisang-at sila’g petisyon nga P1.50 isip dugang sa pletihan sa public utility jeepneys (PUJs) apan hangtod karon wala kini resolusyon o desisyon.
Dugang sa BALACJODA nga sa aduna sila’y natala nga walo ka mga pasaka sa presyo sa lana sukad niadtong Mayo 2017.
“...it is most respectfully prayed unto this Honorable Board to grant immediately this Amended Petition for a P12.00 minimum fare increase for the first five kilometers in Region VII,” tipik sa ilang tulo ka pahina nga giamendahan nga petisyon.
Kon mapatuman kining petisyon sa maong grupo dugang P5.50 ang pagsaka sa minimum nga pletehan gikan sa kasamtangan nga P6.50 sa unang lima ka kilometros.
Matod ni Romeo Armamento, ang bise presidente sa National Confederation of Transportworkers Union-Visayas (NCTU) diin ubos ang transport group nga BALACJODA nga gihimo nila kini nga P12 isip pagpangandam na usab sa gastuhan sa mga operator sa modernization program ingon man ang pagparehab sa ilang kasamtangang PUJ units.
Dugang niini nga prayoridad kanila ang seguridad sa mga pasahero ug aron usab dili na mabag-uhan ang pampubliko nga pasahero sa modernization sa 2020 diin gikatakda nga mosaka ang pletehan.
Hinuon maogi pa kini sa hearing kini matod pa sa LTFRB 7 assistant regional director Reynaldo Elnar.
Ang Cebu Integrated Transport Service Cooperative (Citrasco) una nang nipadayag sa ilang gusto nga himuong P12 ang minimum nga pletehan sa rehiyon subay na usab sa maong bag-o nga balaod.
Apan sa pakighinabi sa Superbalita Cebu sa chairperson niini nga si Ryan Benjamin Yu kagahapon wala sila madayon pag-file pa tungod kay gihulagway nila nga dako ra ang P12 ug meetingon pa kini nila pag-usab.