ANAA pa ang presensiya ni Kagawad Zaldy Ocon atol sa sinemanang meeting sa konseho bisan pa man sa suspension order nga gipagawas sa buhatan sa Ombudsman tungod kay wala pa niini makadawat sa kopya.
Nasayran nga nagpagawas ang Office of the Ombudsman og order alang sa pagsuspenso ni Ocon sulod sa unom ka mga bulan nga walay sweldo.
Sa pakighinabi sa media kang Ocon, gibutyag niini nga nagpaabot pa siya sa order kalabot na sa iyang suspensiyon.
“Wala ko kadawat pa, hulaton nato, as of now, I cannot give any comment, I have my lawyer maybe it should be the duty of my lawyer to answer any questions,” pahayag ni Ocon.
Kahinumdoman nga napatik ning mantalaan niadtong Disyembre 3 tuig 2016 ang pagtaho sa usa ka Ric Emmanuel Agustin, 23, ulitawo, residente sa Xavier Heights, Upper Balulang, ug sakop sa Roads and Traffic Administration (RTA) nga na destino sa Yacapin-Guillermo Streets na sa kapulisan sa Police Station 1 (PS1) sa Divisoria kalabot na sa pagpanagpa ni Ocon ngadto na kaniya diin nasaksihan kini mismo nila ni Atty. Edgardo Uy ug Engineer Nonito Oclarit sulod mismo sa City Session Hall.
Nagsumikad ang panagbangi sa dihang gi-isyuhan sa kauban sa biktima si Ocon og citation ticket nga unattended human naaktohang nakaparada ang sakyanan niini sa yellow box o sa adunay traffic sign nga loading ug unloading diin giingong gikasuko kini ni Ocon human giingong arogante ug bastos kining si Agustin.
Dako na lamang usab ang kakurat nila ni Uy ug Oclarit sa dihang nag-atubang unta diha sa City Hall aron nga husayon apan kalit lang matud pa kining nanagpa mismo sa ilang atubangan.
Sa pahayag usab nga gipagawas sa page sa Office of the Ombudsman, gikabutyag nga nigawas sa imbestigasiyon sa maong buhatan nga nakalapas matud pa kini sa Article 359 o slander by deed kini usab human nga gisagpa ang Road and Traffic Enforcer.