Nalzaro: Dili maki-angayon

MIPAGAWAS og executive order ang “kanhi laos nga pulitiko” nga dakpon ug multahan kadtong mga sakyanan nga mo-counterflow. Kana bang mosugat sa bul-og sa dagan sa trapiko. Gumikan kay mao kini ang hinungdan sa disgrasya ug makapasamot sa kahuot sa trapiko.

Tinuod, daghan bitaw ang mo-counterflow sa pikas nga bahin sa kalsada kon bug-at ang trapiko sa ilang gisubay nga linya labi pa kining mga nagmotorsiklo.

Dakpon sa mga traffic enforcers ang mo-counterflow ug multahan. Apan dili pa na mao ang multa. Ipa-impound pa ang madakpan nga sakyanan balig usa ka buwan. Ang mga tag-iya og mga motorsiklo pabayron og P100 matag adlaw isip storage fee. Tres sientos pesos sa mga gagmay’ng sakyanan kada adlaw ug P500 matag adlaw sa mga dagkong sakyanan sama sa mga delivery van ug trailer trucks. Exempted ang mga bombero, ambulance ug pulis kon magtubag og alarma.

Okey man ni ba kay daghan ang mga abusado. Apan kining silot nga ipa-impound ang sakyanan sulod sa usa ka buwan sobra ra sab. Nganong paabton man og usa ka buwan kon makabayad sa multa ang tag-iya? Ang tumong ani mao ra man kaha ang pagdisiplina sa abusadong drivers? Di pa diay igo nang multa pinaagi sa pag-isyu og citation ticket sa abusadong driver? Ang counterflow usa sa mga traffic violations base sa atong Local Traffic Code ug nagtangag og P500 nga multa.

Mas bug-at pa kanang ubang traffic violations sama anang “no left o right turn,” “beating the red light” ug uban pa kay sa counterflow. Unsa may tumong anang 30 days nga impounding? Aron madisiplina og maayo ang driver? Siguro ang tumong sa Siyudad mao nga makakuwarta.

Kon i-impound ang sakyanan, mabantayan kaha na sa traffic enforcers? Di kaha na himol-bulan? Mipalit man gani ta og sakyanan para convenient sa paglakaw kay sa mosakay tag jeep o taxi, unya karon hikawan ta kay nakalapas sa lagda sa trapiko nga puwede rang multahan? Di kini maki-angayon. Maayo unta og naay mo-kuwestiyon ani sa husgado aron masuta ang legalidad. (bobbygnalzarp@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph