NIREKLAMO na si Lapu-Lapu City Mayor Paz Radaza sa pagpunay sa Metro Cebu Water District (MCWD) og kubkob sa kalsada sa nagkadaiyang dapit sa siyudad nga iyang gibasol nga usa sa nakapasamot sa kahuot sa trapiko.
“Mao pay apiki nang daan ang atong dalan, naa pa gyud ni sila (MCWD),” matod pa ni Radaza atol sa regular press conference.
Usa sa wa ma-uyoni sa opisyal nga wa sila masayod hangtod kanus-a ang proyekto sa MCWD ug asa kutob ang pagpangubkob sa sementadong kalsada sa Lapu-Lapu, taliwala sa mga suwat nga gipadala ngadto sa maong buhatan nga giingong wa nila mahatagi og katin-awan.
Gitumbok ni Radaza ang kinawtan diha sa barangay Mactan ug Ibo nga nakahasol sa mga motorista gumikan sa nag-aginod ang dagan sa trapiko kay manglikay nga dili ma-shoot sa libaong.
“Kon gitabunan man (kinawtan), di na mao ang pagkatabon. Bati na hinuon ang dalan,” reklamo sa mayor.
Nasayran nga ang buhatan sa mayor ingon man diha sa Facebook page sa Lapu-Lapu City government naputos sa reklamo gikan sa publiko kalabot niini hinungdan nga na-alarma na ang mga opisyal.
Gihangop ni Radaza ang katuyoan sa MCWD nga ila pang mapalambo ang ilang serbisyo sa mga konsumidor sa Lapu-Lapu apan “abusado naman hinuon,” paghulagway pa niya.
Tubag sa MCWD
Gipasabot ni Charmaine Rodriguez-Kara, tigpamaba sa Metropolitan Cebu Water District, nga wa dayon matabuni ug masemento ang gipangkubkob nga mga sementadong kalsada sa mga barangay sa Lapu-Lapu gumikan kay kinahanglan pa ipaubos sa hydro test ang mga tubo pagseguro nga nakapasar sa standard ang P97 milyunes nga proyekto sa Barangay Pusok ngadto sa Mactan.
Matod niini, ang hydro test maoy moseguro nga way lungag o liki sa gipangtaod nga mga tubo sa mga contractor.
“So, from the source to the end sa katong bag-ong pipeline kinahanglan mopasar siya sa water quality during the hydro testing period. i-temporary backfill ra na ang gi-excavate, usa pa siya sementuhon ug aspaltuhon,” pagpasabot ni Kara.
Suma pa niini, dili mahimo masemento kon way hydro test kay dako kaayo og gasto kon ikonkreto unya bakbakon og balik.
Si Kara niangkon nga nakaapekto usab ang ulan sa pagtrabaho sa proyekto kay sa matag ulan inig kabasa sa yuta, mosag ang yuta nga itabon.
Sumala sa standard sa Department of Public Works and Highways, kinahanglan compacted una ang yuta nga itabon sa dili pa makasugod og semento.
“We cannot allow nga mosag ang dan kay mo-affect pud siya, mo-add man siya og weight didto sa pipe maong gi-temporary og backfill,” dugang pagpasabot niini.
Si MCWD general manager Jose Eugenio Singson Jr. nimando sa mga contractor nga kadtong bahin nga pwede na masemento, ipasugod na.
Si Kara nidugang nga 90 porsyento na ang pagtrabaho sa proyekto ug karong Mayo gipaabot mahuman na kini.
Siya nangayo og pagsabot sa apektadong mga motorista ug publiko kay ang proyekto magdala og dugang supply sa tubig sa tibuok Mactan Island gikan sa mainland Cebu.
Sa 2018, 93,000 cubic meters ang demanda sa tubig sa matag adlaw sa Lapu-Lapu, diin ang kasamtangan nga produksyon sa mga tabay sa Mactan kay 8,000 cubic meters ug dugang 21,000 cubic meters gikan sa mainland Cebu.