LAING Barangay Mayor’s Office na usab ang nalambigit sa laing kontrobersiya human giiingong nag-solicit na usab, di lang diay niadtong nakalabay nga Sinulog 2018, apan lakip kadtong mga nangagi nga party.
Nanggamit pa kini og official seal sa barangay.
Apan si Cebu City Mayor Tomas Osmeña kinsa mao ang gaumol sa BMO sa pipila ka barangay sa dakbayan sa Sugbo, wala pa’y plano nga bungkagon kini subay na usab sa panawagan ni Konsehal Raymond Garcia.
Ang nalambigit sa kontrobersiya nga karon gireklamo kining BMO sa Barangay Mambaling.
Kagahapon gipakita ni Garcia ang suwat gikan sa kapitan sa Barangay Mambaling Wilfredo Go nga gi-address sa mayor mahitungod sa taho ug reklamo nga nadawat niini, matod pa, ang BMO giingong nag-solicit og kwarta di lang alang sa Sinulog, apan lakip na, matod pa sa ilang Christmas party ug uban pa.
Lakip sa gipakita sa konsehal ang solicitation letter nga gipasukip sa suwat sa kapitan nga niadtong Disyembre, ang BMO-Mambaling nagpadala, matod pa, og solication letter gamit ang official seal sa barangay nga pinirmahan ni Narcia Gador nga nag-solicit sa usa sa mga dakong mall sa SRP alang sa ilang Christmas party.
Ang laing solicitation letter aduna’y petsa nga November 16, 2017 diin giingong nangayo og financial assistance kay duna sila’y contingent sa Sinulog nga pinirmahan sa ilang choreographer, BMO head, BMO official/organizer ug BMO asst. head.
Gihulagway ni Garcia nga kalapasan kini sa Republic Act 1319 kun Anti-Graft and Corrupt Practices Act.
Nagtuo usab siya nga di lang ang BMO sa Apas ug Mambaling ang mihimo niini hinungdan nga mi-apelar kini kang Osmeña nga i-shut down ang tanang BMO offices tungod kay gawas sa maong kalapasan, giingong mi-abusar sab kini sa gahom pinaagi sa paggamit sa ngalan sa mayor.
Base sab sa gipagawas nga opinyon sa Department of Interior and Local Government (DILG) nga wala mo-exist kining BMO kay ang gipirmahan, matod pa, ni Osmeña nga executive order no. 05 nga nag-umol sa barangay disaster control center nga ang mandato mao ang pag-asister kon dunay mga kalamidad.
Si Osmeña, sa iyang bahin, nagkanayon nga ipasusi niya ang maong insidente apan wala kini plano nga i-shut down ang tanang BMO office tungod lang sa mga kalapasan nga nahimo niini.
Wa pa sab niini makita ang suwat nga gipadala sa kapitan sa iyaha mahitungod sa report ug reklamo nga iyang nadawat may labot sa solicitation ug sutaon niya kon kinsay responsable ug wa ra sab maalarma si Osmeña sa mga nahitabo.
Gitataw sa mayor ang tumong sa pag-umol sa BMO aron i-representar ang mayor sama sa gihimo matod pa sa milabay nga administrasyon nga mao ang city hall at your doorstep.