NAKUGANG ang kapulisan sa lungsod sa Madridejos, isla sa Bantayan kay gawas sa upat ka mga putos sa gituohang shabu nga ilang nasakmit gikan sa maestro nga ilang gi-buy bust, nakuhaan kini nila og cell phone nga dunay upat ka mga sex video.
Apan si Pablito Miro, 31, nagpuyo sa Brgy. Pabrika Madredejos, lumad nga taga lungsod sa Santander, daling nanghimakak nga siya ang usa sa naa sa video.
Uban nga nasikop ni Miro mao ang lima ka mga tinun-an nga naaktuhang nagsuyop og shabu samtang ang uban giingong namaligya og shabu.
Napalgan sa kapulisan ang upat ka mga sex video tali sa usa ka bayot ug lalakeng partner.
Nagtuo ang kapulisan nga si Miro ang naa ug nagkuha sa video.
Si Sr. Insp. Joseph Mangle, hepe sa Madridejos Police nga nahinabi sa Superbalita Cebu, niingon nga nanghimakak si Miro nga siya ang naa sa upat ka mga sex video.
Matod pa ni Mangle nga lubog ang kuha sa video, di maklaro ang mga nawong sa nag-sex nga pulos mga lalaki.
Lakip sa nanghimakak ang mga dinakpang estudyante nga sila ang naa sa video.
Wa mosulti si Mangle kon ila bang imbestigahon si Miro sa posibilidad nga dunay menor nga nalambigit sa sex video.
Si Mangle nagkanayon nga si Miro, nga usa ka bayot, naa sa watchlist sa kapulisan sa lungsod sa Santander ug wa mosurrender sa tokhang.
Pagka July sa miaging tuig naabot kini sa lungsod sa Madridejos ug nitudlo sa usa sa mga tunghaan.
Ang tunghaan nga gikuhaan unta og pamahayag sa Superbalita Cebu nagdumili sa pagluwat.
Si Mangle nitug-an nga niadtong Disyembre sa miaging tuig, gimonitor nila si Miro human sila nakadawat og impormasyon nga namaligya og drugas.
Ang ubang mga estudyante niini giingong maoy kauban sa pagpamaligyag drugas.
Sa impormasyon nilang nakuha, ang ubang estudyante nga drug user, gawas sa pagamit sa drugas, giingong gamiton sab ni Miro sa pakighilawas.
Ang shabu nga gipamaligya sa maestro gikmpra niini sa Ermita, dakbayan sa Sugbo.
Gisusi na kini sa kapulisan sa Madridejos.