GIPANEGURO sa lokal nga panggobyerno sa Davao ilabi na sa Sports Development Division (SDD) nga way mga atleta sa matag delegasyon ang matulog sa salog o karton sa umaabot nga Davao Region Athletic Association (Davraa) 2018 sa Pebrero 17 nga himuon sa siyudad sa Davao.
Kini ang pahayag ni SDD-CMO officer-in-charge Mikey Aportadera atol sa Davao Sportswriter Association (DSA) Forum didto sa 2nd floor, SM City Davao Annex, kagahapong adlawa, January 25.
"No cartons. I don't think if the mayor wants anybody sleeping on the floor or sa cartons. Our mandate is to take care the welfare of the delegates. Naa nay initial matresses naabot, sa 7,000 ang half naabot na," matud ni Aportadera.
Dugang ni Aportadera nga 80 porsyento na andam ang siyudad sa pag-host diin pipila na lang ang ginahan-ay.
"We all making sure billeting areas ginalimpyuhan, water ug electrical supply while focus sa City Engineer Office ang access road to billeting areas," dugang niya.
Gilauman nga anaa sa 10,000 delegasyon ang moabot.
Giimbita sila Senador Manny Pacquaio, Olympic silver medalist Hidilyn Diaz, ug Presidente Rodrigo Duterte.
"With due respect, we're sending invitation to Presidente kasi for how many years, mga 20 years bago nabalik ang hosting sa Davao. Si Senador Pacquaio baka sa opening and Diaz sa closing," matud ni Aportadera.
Anaa sa 31 ka events sa managlahing venue ang ipahigayon sa siyudad sa Davao, apan ang swimming event himuon sa Davao del Norte Sports Complex tungod wala pa nahuman ang ginatukod sa University of the Philippines (UP) Mintal.
"Ang pool sa UP is still in negotiations kung kanus-a mahuman so para segurado sa DaVnor himoun ang swimming, ang mga athletes dun na sila mag-billeting," matud niya.
Sulti pa ni Mikey nga andam na sab ang University of Mindanao (UM) Matina Campus nga mag-host sa opening diin duna nay bleachers nga maka-akomodar og 3,000 apan magdugang og mga lingkuranan.
Ang Davraa maoy mahimong kwalipikasyon alang sa Palarong Pambansa 2018 nga himuon didto sa siyudad Vigan sa Abril.