KIDAPAWAN CITY -- Magsuon nga miyembro sa Moro Islamic Liberation Front (MILF) gibanhigan alas 2:00 sa hapon niadtong Miyerkules.
Giila ang napatay nga si Azmie Omar Akbar, 34, minyo, samtang samdan ang igsuon niini nga si Laipe Omar Akbar, 22, minyo, ug mga molupyo sa Barangay Balong, Pikit, North Cotabato.
Gibutyag ni Pikit Chief of Police Romy CastaƱares nga sakay ang mga biktima sa usa ka motorsiklo paingon sa Datu Piang, Maguindanao. Pag-abot nila sa Barangay Gli-gli, Pikit, kalit lang mibutho ang duha ka wala mailhing lalaki ug gipamusil sila gamit ang kalibre .45 nga pistola.
Patay gilayon si Azmie nga naigo sa ulo ug nawong. Nag-angkas siya sa motor ug nahulog human sa insidente.
Naigo sab si Laipe sa iyang paa apan nakahimo sa pagpadagan sa motor niini paingon sa luwas nga dapit.
Ang naangol nga si Laipe gidala dayon sa mga pulis ngadto sa Cruzado Medical Hospital ug luwas na sa makuyaw nga kahimtang.
Dako ang pagtuo ni Pikit Mayor Sumulong Sultan nga posibleng personal nga atraso o rido ang motibo sa pagpamusil sa magsuon.
Apan kapulisan Pikit Municipal Police Station padayon pa nga nga nag-imbestiga sa hitabo. (Edgar E. Fuerzas)