GITINGOHA karon sa kapulisan sa Police Station 9 (PS9) sa Macasandig inubanan sa Station Advisory Council (SAC) nga mahimong smoke-free ang ilang area ilabi na ang Barangay Macasandig ug Nazareth.
Nagpahigayon og regular nga meeting ang PS9 inubanan sa nagkadaiyang sektor nga membro sa gimugnang council nga hugot ipatuman ang balaod nga gipagawas sa administrasiyong Duterte diin gidili ang pagpanigarilyo sa pampublikong dapit.
Gibutyag ni Police Senior Inspector Abdul Alim Sumandar, hepe sa PS9 ug chairman sa gimugnang council, nga human na-uyonan atol sa gipahigayong regular meeting, hugot na nilang ipatuman ang pagpamadlong ug pagbantay sa mga manigarilyo sa mga pampublikong dapit ilabi na sa ilang nasakopan nga mga Barangay.
Buot usab nila nga mamahimong smoke-free ang maong dapit ug usab mamahimong sumbanan sa uban diin ipatuman ang hugot nga pag-implementar sa maong balaod.
“When it comes sa Smoking in public places mao na atong bag-ong programa karon nga na-agreehan nato sa atong Station Advisory Council nga among e-strictly implement,” pahayag ni Sumandar.
Dugang pa niini nga nasugdan na nila kini kaniadto apan mas pahugtan pa karong panahona alang na usab sa kaayohan sa tanan lakip na ang pagpamaligya sa mga ilimnong makahubog ug sigarilyo ngadto sa mga menor de edad.
“Mamadlong na mi og gapanigarilyo sa kadalanan,among e-intensify pa kay nagstart naman mi sauna karon intensify na gyud ang pagpamadlong ug kaning drinking in public places pati kining selling of liquor and cigarettes to minor,” dugang pahayag ni Sumandar.
Pagpanigarilyo sa mga estudyante mikunhod.
Gibutyag usab sa principal Charlyn Baylon sa Macasandig National High School nga human nga gipagawas ang Republic Act on Free Air Act, naghimo gayud dayon kini sila og aksiyon pinaagi sa pagpangtapot og mga poster lakip na tarpaulin sa mga tindahan nga duol sa maong tunghaan.
Gibutyag usab niini nga human sa gihimong kampanya o adbokasiya nasutang nikunhod na ang kaso sa mga gapanigarilyo nila nga mga estudyante.
“And now after that campaign or advocacy, we noticed that incidents of smoking among our learners were lessened even by our employees, in school we strictly implemented the executive order of President Duterte and they have dramatically stopped in smoking within the school premises” pahayag ni Baylon.
Gidugang pa usab niini nga dako ang pasalamat sa maong gipatumang balaod gumikan kay dako kini og tabang ug impak ngadto na sa mga estudyante lakip na usab sa kumonidad.
Nasayran nga gipirmahan ni Presidente Rodrigo Duterte niadtong Mayo 16, 2017 ang Executive Order 26 Providing for the establishment of smoke-free environments in public and enclosed places, nationwide smoking ban order o ang pagdili sa pagpanigarilyo sa pampublikong dapit.