MALIPAYON ang mga mag-uuma ug bisan ang mga piniriso human nga hurot-hurot gayud ang ilang mga gipanindang mga produkto diha sa hawanan sa Kapitolyo diin mokabat matud pa sa P240,479.50 ang total sa ilang kita.
Kini ang ikaduhang hugna sa maong gipahigayong Farmer’s market matag Biyernes diha mismo sa Capitol grounds.
Mapasigarbuhong gibutyag ni Assistant Provincial Agriculturist Linda Tecson nga dako kaayo ang ilang pasalamat sa inisyatiba ni Governor Bambi Emano gumikan na usab kay dako kaayo og tabang ang maong Farmer’s market alang sa mga mag-uuma nga mailhan ang ilang mga produkto ug matagamtaman nila ang ilang mga hinago-an.
Nagpasalamat usab kini sa katawhan nga mibisita sa maong dapit ug namalit sa mga produkto sa mga mag-uuma diin dako kaayo ang ilang kita ning panahona.
"Buyag kaayo atong farmer's market karon kay gidumog gyod siya pag-ayo sa mga kunsumante. Naa gani uban nga alas 12 pa sa udto hurot na ilang baligya," mapasigarbuhon nga pahayag ni Tecson.
Nasayran nga ang aduna’y pinakadako og halin mao ang fresh egg sa itik nga mobalor og P88,000.00 samtang mikita usab og P5,385 ang mga ginama sa itlog sa itik sama sa leche plan, salted egg ug ballot.
Nahurot usab matud pa ang mga box sa Oolong tea nga nagkantidad og P4,200.
Malipayon usab ang mga piniriso sa Misamis Oriental Provincial Jail (MOPJ) human nahatagan sa kahigayonan nga mokita pinaagi sa ilang ginamang mga chicharon ug ubang produkto diin miabot ang ilang halin sa P2,240.00.
Mihalin usab matud pa og P3,700 ang lamiang ginamos sa produkto sa Titings nga gikan sa Libertad.
Moabot usab sa P4,062 ang halin sa herbal products sa Victory global sama sa turmeric samtang ang 4H club nga gilangkoban sa mga kabatan-onan sa Misamis Oriental ang mihalin usab og P5,555.00 human nga nahurot-hurot usab ang ilang mga preskong utanon.
Ang Doalnara nga sa usa sa dako og sales tungod sa mga organic nga prudokto sama sa lettuce, mushroom, ug uban pa ang mikita og P26,675.
Samtang ang fish vendor sa Balingasag nga hapon na nahidangat ang nagdala og 30 kilos nga bangus ang halin deretso mikita og P4,022.
Ang uban prudokto sama sa bugas, coffee, tablea, wild honey, cassava krispies, fish cracker, barbecue, sweet corn ug uban processed foods ang mikita usab og maayo.
Gidugang pa ni Tecson nga misaka na ang ihap sa milambigit sa maong programa human nga aduna na’y 25 ka mga asosasiyon o partisipante nga naninda sa maong dapit kumpara sa unang pagsugod niini diin anaa lamang kini sila sa 16 ka mga asosasiyon.
Matud ni Tecson nga misaka usab ang ihap sa misalmot karon semanaha nga moabot sa 25 ka partisipante o asosasyon kon itandi niaging semana sa pagsugod nga adunay 16 lamang ka mga operatiba ug asosasyon nga misalmot.
Nagpasalamat usab kini sa mga sakop sa prensa diin usa sa mga nakatabang aron nga ma-promote kining maong programa. Gibutyag pa niini nga lauman sa katawhan ug kunsomante nga sa sunod semana mas daghan pa nga mgaprodukto ang ilang e display sa maong dapit nga pweding mapalit.
Nag-aghat usab kini ug nagdapit sa tanan nga mga Misamisnon nga aduna’y mga ginamang produkto sa ilang lungsod sa pagsalmot sa gipahigayong sinemanang Farmer’s market lakip na usab nga gi-aghat niini ang tanang katawhan sa pagbisita sa maong hawanan matag Biyernes.