NINDOT kaayo pamalandungon nga sa panahon sa mga Israelinhon, ang Diyos naghatag na daan og pahimangno alang kanila nga adunay manlalaban sa langit alang kanila ug sa tanang katawhan. Kini mao ang paghimo kang Aaron nga mahimong punoang pari (high priest) ug sa iyang mga anak nga mga pari (priests).
Unsa ba gayud ang buluhaton sa pari? Matud pa sa Exodus 28: 30, ang pari maoy nagadala sa hukom sa katawhan. Sa laing pinulongan, siya ang ginapaninglan sa Diyos ilang mga kalapasan. Siya maoy tigtubag sa matagsala nga mahimo sa iyang mga katawhan.
Siya usab maoy tighangyo ngadto sa Diyos alang sa katawhan (Ex. 32: 11). Siya maoy tigpataliwala sa Diyos ug sa tawo, nagahangyo alang sa ilang kapasayloan aron mapasaylo. Busa, tungod niini, siya maoy nagapahiluna sa katawhan alang sa ilang kaluwasan (Heb. 4: 16).
Gituohan sa unang panahon nga kung walay pari o sacerdote, dili mapahiluna ang kaluwasan. Busa, ing-ana kaimportante ang pari sa kaluwasan sa matag-usa.
Ang Bibliya nagahulagway sa sinina sa pari. Ug matag-butang niining sinina adunay mga importanteng ipasabot. Dinhi nato diskusyonan niining atoang segmento aron atong masayran ang gusto ipahat sa Diyos kanato, ug makadawat sa mga bidlisiw sa paglaum.
Atong hisgutan ang lana sa mga pari. Kining lana sa olibo maoy ginagamit sa mga pari sa pagkonsekrar sa mga butang sa sanctuaryo, pagdihog sa mga gi-ordinahang katawhan ug pagpasiga sa lampara sulod sa sanctuaryo.
Ang Salmo 133: 1, 2 nagahisgot mahitungod sa lanang pangdihog. Kining lana maoy nagasimbolo sa Balaang Espiritu nga maoy maghiusa sa katawhan sa Diyos. Kung walay lana, ang lampara sa sanctuaryo dili gayud magsiga. Ug kanato usab, dili gayud kita mahiusa kung walay Balaang Espiritu nga magtabang kanato.
Matud pa sa usa ka Kristiyanong magsusulat, "Nagakinahanglan kita og bag-ong lana matag-adlaw. Ang kalangitan nagahulat sa kadaghanan nga makadawat og balaang lana, aron mahimo kitang mga pagpakamaayo ngadto sa uban. Kung kita maghiusa kang Ginoong Jesus sa pagministro alang sa uban, mahimo kitang mga ahensiya sa kalangitan aron makamantala og kaayohan sa tibuok kalibutan" (EG White, Mga Testimoniya Alang sa Iglesia vol. 6, p. 116).
Si Jesu-Kristo maoy atong punoang pari. Si Pablo nagpadasig kanato nga sa tanang panahon, magdangop kita sa trono sa grasya tungod kay ang atong labaw'ng sacerdote nga mao si Ginoong Jesus nagalingkod sa tuo nianang trono, aron makadawat kita og kaluoy ug makakaplag kita og grasya (Heb. 4: 14- 16).
Busa, matag karon ug unya, atong hangyuon Kaniya kining Balaang Lana nga magahatag kanato og kusog sa paglupig sa atong mga kaluyahon, ilabi na gayud sa paghiusa kanatong Iyang mga katawhan, aron paspas nga pagmantala sa maayong balita atong makaplagan.
Kini usa sa mga bidlisiw sa paglaum nga atong maangkon.