NAKAGAWAS sa prisohan ang konsehal sa lungsod sa Cordova nga nadakpan niadtong Huwebes human kini giingon nga nagsugal sa usa ka casino sa dakbayan sa Lapu-Lapu.
Way nakitang rason ang assistant city prosecutor sa dakbayan sa Lapu-Lapu nga si Sheilamar Saliganan-Abadia nga itanggong si Cordova Councilor Lemuel Pogoy human gidakop sa kapulisan tungod sa pagpanugal.
Sa resolusyon niini niadtong Enero 26, base na usab sa giingon nga kalapasan sa Open Disobedience ubos sa Article 231 sa Revised Penal Code of the Philippines nga giamyendahan sa Memorandum Circular No. 06.
Gipasabot ni Abadia nga ang “Open Disobedience” alang lang kini sa mga nilabas gikan sa judicial ug executive nga mga opisyal diin wala’y labot si Pogoy niini tungod kay usa siya ka konsehal ug ubos siya sa legislative office.
“The finding of lack of criminal liability does not presuppose that the RESPONDENT cannot be held administratively liable for his acts,” tipik sa maong resolusyon. Gipirmahan na usab ang release order sa maong konsehal.