MORAG tibuok newsroom sa SunStar Cebu ug Superbalita lakip ang mga kaubanan ni Olga “Gingging” Aledo-Campaña sa radyo ang atong nahimamat kagahapon sa udto diha sa St. Catherine Church sa Syudad sa Carcar.
Subo nga palandungon nga bata pa mipanaw ngadto sa laing kalibotan si Gingging.
Dihang 46 anyos pa ko, tinuod naa na kita nianang mga kahimtang sa lawas nga resulta sa mga pressure isip tigbalita, ang pag-ipon sa cholesterol sa lawas tungod sa lifestyle nga sigi lang naglingkod atubangan sa computer, ug uban pa. Ug lakip sa risgo sa panglawas mao kining aneurysm diin mobuto ang ugat.
Nakahinumdom ko nga usa kaniadto sa among typesetter sa Superbalita nitaliwan usab tungod sa maong kahimtang.
Makapahinuktok kini kanato nga di gyud kita usa ka superman nga makabuhat ug maka-atubang sa tanan.
Di man kami suod ni Gingging. Apan sigi na ko makadungog kaniya isip usa ka kugihan nga reporter sa Bantay Radyo kaniadto ngadto sanaabot sa SunStar Cebu isip reporter dayon editor.
Isip usa ka inahan nga tigbalita, di lalim oy ang pagbalanse sa mga presyor sa newsroom ug sa pamilya labi na nga mag-uli-an man kini siya sa Syudad sa Carcar. Ambot lang sab niining mga taga-Carcar nga naa sa SunStar nga di man sab gyud mosipyat sa pagpauli kada adlaw.
Tungod niini, nakaingon ko sa akong kaugalingon nga dalaygon si Gingging.
Pagsugod pa lang sa funeral procession gikan sa Tupaz Funeral Homes padulong sa simbahan, kalit nga nihilak ang usa ka bata. Pag-umangkon diay kadto ni Gingging. Daw gikumot akong kasingkasing nga nagsud-ong.
Unsa na kaha silang mga kauban ni Gingging kada adlaw sa newsroom dihang magsugod na sa pag-nga-ab ang mga suod mga kabanay?
Bye, Ging.
Tinuod nga balita
Niagi ako isip usa ka reporter sa Newstime Daily ug correspondent sa duha ka wire agency nga mao ang Philippine News and Features (PNF) ug Union of Catholic Asian News (UCAN). Nahimo sab akong usa ka editor sa tulo ka mantalaan – managing editor sa Newstime Daily, city editor sa SunStar Cebu, ug managing editor sa Superbalita.
Tungod niini, nakahibawo kaayo ko sa dakong hagit niining pagpangita dayon pagsulat og mga balita. Makasabot sab kaayo ko sa grabing presyor nga makapasaka sa blood pressure sa mga tigbalita.
Mao nga makasabot sab ko nganong grabi ang kasuko sa mga tigbalita sa Sugbo niining Cebu Flash Report nga nailhang tinubdan sa mga fake news dinhi sa atua.
Lalim bay ordinaryong mga tawo nga magpasi-aw kabahin og bomba mabalhog gyud dayon sa prisohan. Apan kini CFR nga nipakatap og fake news kabahin og usa ka bomba, hangtod karon di mahilabtan. (@anol_cebu sa Twitter)