Nalzaro: Midagan na ang Train Law

SAMTANG ang atong mga nasudnong magbabalaod nagsige na og debate kabahin kon unsa-on pag-amendar ang atong 1987 Constitution aron mo-usab sa atong sistema sa pang-gobiyerno ngadto sa Federalism, hinay-hinay na natong nabatyagan ang pagdagan sa Tax Reform for Acceleration and Inclusion (Train) law.

Una, bisan niadtong pagsugod pa lang sa tuig, misaka na dayon ang presyo sa mga petroleum products gumikan sa excise tax nga gipatong niini ubos sa Train Law. Kini bisan kon aduna pay igong supply ang mga oil companies nga ilang gi-angkat niadtong miaging tuig nga wala pay gipatong nga excise tax.

Ikaduha, mipasaka usab dayon ang mga manufacturers sa ilang mga produkto sama sa mga sweetened beverages nga apil sa gikolektahan og excise tax. Subo palandungon ang mga ahensiya sa gobiyerno sama sa Department of Energy nga adunay control sa mga petroleum products wala dayon makabadlong sa mga oil companies.

Otro pod ang taga Department of Trade and Industry (DTI) igo lang sa pagpanghulga sa mga retailers nga mipasaka dayon sa presyo sa mga nag-unang palaliton. Sige lang og ingon nga ilang lutuson ug gukdon ang mga mapahimuslanon sa panahon. Pero walay ngipon. Aduna kahay ilang nadakpan ug napasakaan og kaso?

Karon ang bugas na gyud maoy misaka. Namatikdan ang pagsaka balig piso matag kilo sa ordinaryo nga bugas ug dos pisos sa espisyal nga klase. Na, kon bugas na gani ang mosaka nga maoy atong gikaon kada adlaw, medyo makapa-alarma na gyud na. Aber, karon unsa may mahimo sa kagamhanan ani? Mao na ni resulta aning Train Law. Aduna tuoy nakabenipisyo apan daghan ang mag-antos og magsangki-ig gumikan sa pagsaka sa presyo labi na sa nag-unang mga palaliton.

(bobbygnalzaro@gmail.com)