DAGHAN kaayong talinghaga ug kontradiksyon ang kinabuhi. Bisan ang mga manggialamon sa siyensiya ug sosyolohiya dili makatugkad niini. Ang kanhi kontra nagkahigala na karon. Ang kanhi suod nga kauban, nahimo nang hingpit nga kaaway.
Ang akong kaila nga hasta kamangtas, palikero ug palaigit kaniadto nahimong pastor sa simbahan ug di na moinom bisan usa ka tulo sa bino. Ang usa nako ka kaila nagkabulag human sa 30 ka tuig nga kaminyuon.
Ang kanhi nag-HHWW (holding hands while walking) ug nagsaad nga dili magbulag, nanglubad human ang asawa nakahuman sa kursong nursing ug nakatrabaho sa Amerika. Nagtrabaho isip nurse sulod sa lima ka tuig sa Amerika ang asawa samtang naghulat ang iyang bana ug upat nila ka anak aron kuhaon.Aduna nay ikaduhang bathala ang asawa sa Amerika ug gikalimtan ang tanang matam-is nga saad nga sa kahamugaway ug kapit-os, managkauban sila hangtud sa kahangturan. Manag-uban ra man diay sila hangtud sa Ninoy Aquino International Airport.
Mas samot sa politika. Ang kanhi alyado nahimong kontra, ang kanhi kauban sa partido nagkontra partido na. Ang anak nikontra sa amahan, ug amahan nikontra sa anak tungod sa politika.
May asawa nga nidagan batok sa iyang bana sama nga may bana nga nidagan batok sa asawa. Ang mortal nga karibal nag-tandem sa susamang partido nga giambakan sa usa.
Ginaingon man nga walay permanenteng higala sa politika apan permanenteng interes lamang.
Si Presidente Rody suod nga higala kaniadto sa mga komunista. Iya pa ganing gipanghambog nga usa siya ka sosyalista nga dangaw ray pagitan sa pagka-komunista.
Karon, nahimo na siyang numero unong kontra sa komunista nga iya kanhing gidayeg.
Gitawag pa kini niya nga terorista bisan sa kanhiay'ng panahon nakigbiso-biso siya sa giingon niya nga mga rebolusyonaryo. Gani usa kini sa nakapahimo kaniyang bantugang politiko ug presidente.
Wa gayud tingali "forever," gawas sa akong higala nga si Evir sa Gensan nga hapit nang mahimong abogado.
Kaniadtong nahimong "best friend forever" sa Pilipinas ang Amerika apan karon giitsa-puwera kini pabor sa China, Japan ug Russia. Hasta ang European Union nga naghatag og ayuda sa nasud gisaway sa pangulo nga nanghilabot sa dagan sa Pilipinas.
Gani, karong bag-o lang, nahimong bisita ni PRody ang pipila ka sakop sa Central Committee sa Communist Party sa People's Republic of China nga gitukod ni chairman Mao Tse Tung. Siya ang usa sa dugukan sa rebolusyonaryong panghunahuna ug baruganan sa Maoist nga Communist Party of the Philippines-New People's Army (CPP-NPA) nga gipangulohan sa kanhi CPP chairman Jose Maria Sison.
Gawas ni Mao, nagsunod usab ang partido sa panghunahuna ni Marx nga usa ka Aleman ug ni Lenin nga Russian. Gisunod sa CPP-NPA ang estratehiya ni Mao nga pagpalibot sa lungsod sa kabanikanhan pinaagi sa malahutayong girelya nga armadong pakigbisog hangtud nga masaknit niini ang politikanhong gahum gikan sa mga nagharing hut-ong.
Para kanako, temporaryo ra kining away karon tali ni PRody ug CPP-NPA tungod kay nituo ako nga respetuhon sa pangulo ang sistemamg komunista sa China. Mora'g lisud madawat ang giyera komunista batok komunista nga nitabang sa paglambo sa atong nasud karon.