GIPASABOT ni Police Superintendent Lemuel Gonda, kinsa tigpamaba sa Police Regional Office (PRO)-Northern Mindanao, ang mga gabayan sa bag-ong Oplan Tokhang nga gisugdan Domingo.
Matud ni Gonda nga kining modified Oplan Tokhang ang adunay bag-ong gabayan nga gikinahanglan sundon sa kapulisan.
Gikinahanglan nga adunay upat lamang ka mga pulis nga gitawag og tokhangers nga maoy motoktok sa kabalayan ngadto sa mga validated nga mga pangalan nga adunay kalambigitan sa ginadili nga druga.
Kining upat ka mga pulis ang gipaubos na kini og orientation ug training diin pokos sa demand reduction drive kon mas mapalambo ang police community relation.
Dili pokos niini ang pagpangdakop apan motoktok ug mohangyo sa nalambigit sa ginadili nga druga nga undangon gayud kini. Himoun lamang kini sa alas 8 sa buntag paingon sa alas 5 sa hapon.
Sa dili pa usab tuktokon ang usa ka pangalan, sigurado na kining validated sa intelligence unit.
Ang pulis dili usab mahimong mosulod sa balay atol sa toktok hangyo ug kon wala ang gipangita mahimong storyahon ang sakop sa pamilya.
Wala sab gidili ang pagkuha og video sa kinsa man ang gitoktok ug gitugotan ang katawhan, sakop sa prensa sa pagkober niini. (SVB)