Sugilanon: Sigbin

Samuel P. Rusiana

Bato, Samboan, Cebu

ANG Barangay Kawkaw nga sakop sa lungsod sa Buenavista gidungog nga adunay daghang sigbin. Matod sa katigulangan sa maong dapit, mangadto kini sa daplin sa baybayon panahon sa kagabhion matag subang sa bulan kay manginom og bula sa dagat. Mahibaw-an nila kon adunay sigbin nga molabay padulong sa baybayon kay mag-uwang ang mga iro, unya mokalit og kahilom nga mobahag ang ikog. Tungod kay nasayod na ang mga molupyo kabahin niini, pahiran nila og ahos ang ilang lawas kon molakaw, labi sa panahon sa kagabhion, kay nagtuo sila nga mahadlok ang sigbin kon makatimaho og ahos. Ang ilang timailhan kon mapaakan ang usa ka tawo kay molagom ang panit sa lawas niini.

Si Clarita nga usa ka biyuda maoy labing tigulang nga nagpuyo sa maong lugar ug gidudahan nga sigbinan. Nag-inusara siya nga nagpuyo sa karaang payag nga nahimutang daplin sa sapa nga adunay daghang punoan sa mga kahoy.

Usa ka higayon nagkagubot ang mga tawo sa ilang barangay kay kalit nga namatay si Panya human nakalabay sa pinuy-anan ni Clarita. Batan-on ug baskog pa si Panya mao nga nagtuo ang mga lumolupyo nga napaakan siya sa sigbin, kay may milagom nga parte sa iyang lawas. Sukad mamatay si Panya ang mga tawo dili na moagi sa payag ni Clarita kay nahadlok sila nga mapaakan sa sigbin.

Usa ka adlaw niana giduaw si Clarita ni Arnaldo, bugtong niyang anak.

“Ma, kumusta na?” ni Arnaldo nga miagbay sa iyang inahan.

“Panagsa ka na lang mobisita,” ni Clarita nga nalipay kay nakita niya ang iyang anak.

“Bisan aduna koy pamilya mingawon sab ko nimo,” ni Arnaldo nga milingi-lingi sa palibot. Nahibulong si Arnaldo kay nakakita siyag kan-anan sa hayop ilawom sa payag kay sa iyang nahibaw-an wala may binuhi ang iyang inahan. Basin tinuod ang tabi-tabi nga sigbinan ang iyang inahan.

“Ma, duna kay binuhing mananap?” pangutana niArnaldo samtang naniudto sila.

“Iro lang ug iring. Manuroy sila sa kasulopan labi nag init ang panahon,” pamakak ni Clarita.

Nagpadayon si Arnaldo pagpaniid sa palibot.

“Bitaw, sa tinuod lang aduna koy binuhi nga kabilin pa sa akong ginikanan,” matod ni Clarita nga mipahiyom sa iyang anak.

“Unsa diay nang mananapa?” ni Arnaldo nga intresado nga makakita niini.

“Secret. Mahibaw-an ra unya nimo!” ni Clarita.

Miabot ang panahon nga nasakit si Clarita tungod sa katigulangon. Iyang gipatawag si Arnaldo.

“Kay ikaw lang ang akong kasaligan, alimahi og maayo kining kabilin sa akong gini­kanan. Mao ni magdala nimog swerte pag-abot sa panahon,” ni Clarita nga hinayhinay nga nawad-an sa kinabuhi samtang nagpugong sa kamot sa iyang anak.

Human nalubong ang iyang inahan napamatud-an ni Arnaldo nga tinuod ang tabi-tabi kabahin sa sigbin sa iyang inahan. Tungod kay dili siya ganahan nga moatiman sa kabilin sa iyang inahan nakahukom siya nga patyon kini. Nagpahimo siya og tangkal nga kabilya ug puthaw ug gisulod ang sigbin. Mikuha siya og gasolina ug gibuboan ang sigbin.

“Ma, pasayloa ko sa akong buhaton,” tuaw ni Arnaldo. Dayon gidagkutan niya ang sigbin sulod sa tangkal. Mikisikisi ang sigbin tungod sa kainit ug pagkasunog sa lawas niini, hangtod nga namatay. Giputol-putol ni Arnaldo ang patay nga lawas sa sigbin una gilubong aron segurado nga kini dili na mabuhi.

Milabay ang duha ka bulan sukad sa pagkamatay sa sigbin. May tawo nga miadto sa balay ni Arnaldo. “Sir, ako si Prof. Trump sa University of California. Nangita ko og sigbin aron himuong specimen sa research nga gihimo sa among unibersidad sa Amerika. Nasayod ko nga lisod kini pangitaon, mao nga paliton namo bisan usa ka milyon ka pesos kon dunay mobaligya. Pwede ka makataban namo og pangita?” matod sa propesor. Nahinumdom si Arnaldo sa gipamulong sa iyang inahan kaniadtong buhi pa kini, nga ang sigbin magdala kaniyag swerte kon iyang alimahan. Nagmahay siya, kay kon wala pa niya patya ang sigbin, ma-milyonaryo na unta siya. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph