Nalzaro: Fraternity o gang?

NA-ALARMA karon ang mga ginikanan sa Basak, Pardo og Ba­yanihan, Basak Ibabao gumikan sa recruitment nga gihimo sa matod pa usa ka gang ngadto sa mga batan-on ug mga minor de edad bisan niadtong nagpangidaron og mga nueve anyos pa. Matod sa mga ginikanan nga gang kuno ang nag-recruit sa ilang mga kabataan. Gipang-bunalan og paddle o gipa-ilawom sa ini­tiation isip ritual ug gipasuan og sigarilyo ang luyong bahin sa joint sa kamot ug palad.

Ambot gang o fraternity ba kini ang nang-recruit kanila. Pero base sa akong nahibaw-an kanang maong sign, iya man sa usa ka fraternity nga dili lang nako ibutyag ang pangalan hangtod nga ang mga gi-ilang lider ning maong fraternity mo isyu og pamahayag. Gikinahanglan nga motingog sila niini kon nagtugot ba sila sa pag-recruit og mga minor de edad kay madaot baya sila niini. Mahulog nig child abuse kay mga bata kining ilang gipang-recruit ug gipang-sakitan.

Pero atong ning klarohan nga kining gang lahi kay sa fraternity. Kining gang grupo kini sa mga kriminal o kadtong adunay intensiyon nga mag-kriminal. Mohimo og mga krimen sama sa pagpanulis, hold up ug ma­mamaregla. Samtang ang fraternity grupo kini sa mga hamtong na og pangidaron ug mga professional nga gustong magkahugpong gumikan sa ngalan sa brotherhood ug adunay mga lihitimong tumong alang sa serbisyo sa grupo ug sa komunidad. Kadaghanan sa mosulod og niini mga college students.

Daghan ang mga inilang personalidad labi pa sa abogasiya ug sa pulitika ang mga sakop sa fraternity. Si Presidente Rodrigo Duterte sakop na siya Lex Talliones sa College of Law sa San Beda College ug sa Guardians, grupo sa mga sakop sa militar ug kapulisan. Apan karon nagpasulod na og mga sibilyan.

Pero ang fraternity basta dili ayuhon ang recruitment puwedeng masudlan og mga dautang elemento nga maoy makahatag og mantsa sa pangalan sa organisasyon. Sama nining gihimo karon nga recruitment sa mga minor de edad, makadaot kini kanila. Sus, unsa man intawoy alamag anang mga batan-on. Gusto lang na og grupo og walay kalibutan kon unsa ang ilang gisudlan.

(bobbygnalzaro@gmail.com)