HUMAN sa malamposon nga Sinulog 2018, napalgan sa mga personnel sa Cebu City Hall nga dunay nangawala nga 20 ka mga tolda gikan sa usa sa mga sponsor.
Ang grupo sa Division for the Welfare of the Urban Poor (DWUP), ug Prevention, Restoration, Order, Beautification, Enhancement (PROBE) team, apil ang vendors monitoring mibutyag nga bisan sa kakapoy ug sakripisyo nga ilang nasinati, malipayon gihapon sila tungod sa kahan-ay sa Sinulog vendors hangtod sa Sinulog.
Si Genevieve Alcoseba, operations chief sa DWUP, nibutyag nga nangawala ang 20 ka mga tolda.
“Happy na unta mi ato. Lami na unta ikatog ug sa dihang ang tent namo nawagtang 20 kabuok nga atong giuslan sa Skygo”, matod ni Alcoseba.
Ang Sinulog Foundation dunay mga sponsor ug usa ang Skygo nga maoy nagpa-ulos og 35 mga tolda aron magmit alang sa vendors monitoring subay sa Sinulog nga rota.
Apan Lunes sa gabii human sa Sinulog, wa gihapon kini nakit-an sa night shift sa Probe Team.
Nasayran nga adunay tulo lamang ka tent ang na-recover sa Probe team gikan sa 25 nga ilang natukod.
Ang Cebu City Disaster Risk Reduction and Management Council (CCDRRMC) nakahipos lamang og duha ka mga tolda.
Giawhag sab ni Alcoseba ang publiko nga kon kinsay nakakita sa Skygo nga tolda nga color blue, pahibaw-on sila.
“Kay obligasyon pud nato sa atong mga sponsors nga kinahanglan gyud to mauli, gipahuwam lang gyud to”,dugang pa ni Alcoseba.
Ang maong tent gipagamit di lang sa vendors monitoring, apil na sa medics nga maoy gi-prayoridad. (Mary Diane Salasayo, USJR-Intern)