GIPAILAWOM na sa imbestigasyon ang duha ka mga pulis sa Davao City Police Office (DCPO) human mireklamo ang inahan sa tulo sa mga menor de edad nga nakuhaan sa closed-circuit television (CCTV) camera nga gipangdagmalan sud sa Barangay 19-B, Poblacion District, Davao City.
Sumala ni DCPO spokesperson Senior Inspector Ma. Theresita Plaza-Gaspan nga ang duha ka mga pulis nga sila Police Officer (PO) 1 Jesre Masinading ug PO1 Jeovani Natividad nga pulos sakop sa Mobile Patrol Group (MPG-DCPO) giimbestigahan na sa Investigation Detective and Management Branch (IDMB).
"Sa pagkakaron, giimbestigahan na sa CIDG after sila gipatawag sa atong city director labot sa hitabo," ingon ni Gaspan.
Una niini, nadakpan sa mga barangay tanod atol sa curfew ang upat ka mga lalaki diin ang usa niini hamtong, samtang ang tulo menor de edad hinungdan nga gipangdala ang upat sa Women and Children Protection Desk (WCPD) sa San Pedro Police Station alas 12 sa tungang gabii niadtong Enero 21, 2018.
Mga alas 12:30 sa tungang gabii, gibalik og dala sa mobile patrol ang tulo ka mga bata padung sa barangay hall sa 19-B diin sila PO1 Masinading ug PO1 Natividad ang nag-manned sa MPG patrol.
Subay sa kuha sa CCTV sa barangay, nakita ang duha ka pulis nga ilang gipaluhod, gisumbag ang kuto-kuto, gibunalan ang mga tiil ug gihapak ang ulo sa tulo ka mga menor de edad.
"Kuha yan siya sa 12:59 to 1:23am on January 21, 2018, sa nakita ko sa sumunod na kuha ng CCTV parang hindi na tama ang ginawa ng pulis, sobra naman po, okay lang yung una, kasi sa paa," sulti ni Jose Villanueva, ang administrator sa Brgy. 19-B nga nahinabi sa mga tigbalita kagahapon.
Gibutyag ni Villanueva, wala sila magdahom nga moabot kang Davao City Mayor Sara Duterte-Carpio ang maong hitabo, gumikan kini sa usa ka inahan sa tulo sa mga batan-on nga mireklamo human nagsige na og reklamo ang batan-on sa kasakit sa kalawasan gumikan sa mga bun-og nga nahiagoman niini.
"Yung isa sa apat, yung parent nito ang nagreklamo na kasi maraming pasa at nahihirapan sa paglakad ang anak niya, bahala na ang parent na mag-assess sa kuha ng CCTV na kung saan karapat-dapat naman talaga na magreklamo," dugang ni Villanueva.
Tungod sa hitabo, gilayong nagpagula og pamahayag si Mayor Sara pinaagi sa City Information Officer nga si Jefry Tupas.
"I have ordered Davao City Police Director Alexander Tagum to conduct an investigation on this allegation and mete out the appropriate sanction, if the policemen involved are found to have violated rules on apprehension," pamahayag sa mayor.
Dugang niya nga nakabalo naman unta pag-ayo ang kapulisan sa Davao City
sa ilang obligasyon diha sa paghatag og serbisyo sa katawhan labi na sa mga nanginahanglan.
"We are confident that Davao City policemen know by heart their obligation to uphold the rights of all people, especially those who have less in life and the most vulnerable," sumpay sa mayor.
Giingon sa mayor nga kung mahitabo ang susama niini, i-rescue ang kabataan ug ihatod sa Quick Response Team for Children's Concern (QRTCC), apan kung mosukol sila nga maalaot na ang kinabuhi sa pulis, diha pa sila mohimo og lahi nga pamaagi.
Hilabihan ang kasagmuyo sa mayor sa nahitabo sa kabataan gumikan ning bag-o lang gi-award sa Davao City ang Most Child-Friendly City for Highly-Urbanized Category.
Sa kasamtangan, padayon ang gihimong imbestigasyon sa DCPO ngadto sa duha ka pulis aron mapasakaan kini og tukmang reklamo diin sila gipangdis-armahan na.
Sa pinakaulahing taho, nasayran nga duha na ka mga inahan ang mipatim-aw sa buhatan ni abogado Ranuelo Leonar aron magpatabang sa tukmang reklamo nga ipasaka batok sa nahisgutan nga mga pulis.