BALHOG sa prisohan ang usa ka Japanese national human iyang nakulatahan ang masahista nga babaye kay gusto sa langyaw nga di mag-condom atol sa ilang extra service nga kombati ibabaw sa kama.
Alas 9 sa gabii niadtong Miyerkules, January 31, gipanghatud sa mobile patrol ngadto sa Talomo Police Station ang biktima nga si Leny (bansagon gitago), 26, masahista, taga Barangay Bago Aplaya, ug ang langyaw nga si Shinicho, 45 anyos.
Nasayran nga P1,000 ang sabot bugti sa pagmasahe ni Leny sa langyaw, apan ang langyaw mihangyo og extra service ug gilayong misugot si Leny aron madugangan og P500 ang P1,000 nga bayad sa masahe.
Dihang naghubo na silang duha sa ilang mga sapot ug miinit na ang palibot sud sa kuwarto, mihangyo ang babaye nga magtaod ang langyaw og condom, apan di mosugot ang langyaw.
Kay di mosugot ang langyaw nga mogamit og condom, hilabitan ang iyang kasuko ug iyang gihapak ang babaye sa likod, gisumbag ang tiyan ug gitamakan ang tiil, hinungdan nga nangayo'g pakitabang ang babaye sa front desk.
Daling miabot ang mga pulis ug gipangdala ang duruha sa istasyon, diin didto nahukman sa desk officer nga isulod sa selda ang nasampit nga langyaw gumikan sa iyang gihimong pagkulata sa babaye.
Sukad sa pagsuwat ning balita, ang langyaw pabiling gibalhog sa selda sa Talomo police station aron pasakaan og kaso didto sa korte.