GIWARNINGAN ni Cebu City Mayor Tomas Osmeña ang mga barangay tanod sa syudad nga iyang kanselahon ang ilang P4,000 nga binuwan nga allowance kon mapakyas sila sa pagpugong sa pangpang-recruit sa mga menor de edad sa mga criminal gang.
Ang unang warning sa mayor mao ang bahin sa kapakyas sa mga barangay tanod sa pagpatuman sa curfew ordinance sa syudad. Matod pa niya, kon dunay nga menor de edad nga makita sa kagabhion, nga naglapas sa curfew ordinance, nagpasabot kana nga nagtanga lang ang mga barangay tanod.
Delikado nga ang mga mga batan-on rekruton sa mga criminal gang sa panahon sa kagabhion. Unya kon mang-recruit ang mga gang panahon sa adlawan pa?
u25cf ● ●
Matod pa sa mayor, kinahanglan nga ipatuman sa mga barangay tanod ang curfew ordinance aron kapugngan ang mga ginagmay nga mga krimen ug ang pagdaghan sa mga gang dinhi sa syudad.
Kon mapakyas ang mga tanod, mo-hire si Osmeña og mas daghang sakop sa Barangay Intelligence Network (BIN) aron pagpatuman sa ordinansa sa curfew.
Matod pas mayor, kinahanglan nga trabahoan sa mga tanod ang ilang allowance nga gidawat gikan sa Siyudad.
u25cf ● ●
Si Cebu City Councilor Dave Tumulak, ang deputy mayor for police matters, niawhag sa mga opisyales sa 80 ka mga barangay sa syudad nga motabang sa pagsumpo niining mga gang nga maoy responsable sa pag-vandalize sa mga bongbong ug public structures.
Matod pa ni Tumulak nga sumala sa mga ulahing imbestigasyon, ang mga menor de edad nga naa pa sa Grade 4, Grade 5 ug Grade 6 gi-recruit na sa mga gang. Ang ilhanan mao nga gipasuan og sigarilyo ang ilang mga pulso.
Nagkanayon si Tumulak nga mawagtang kining maong suliran kon ipatuman ang curfew ordinance ug pirming magpatrolya ang atong kapulisan.
u25cf ● ●
Ang curfew, nga gilatid sa Cebu City Ordinance 1786, nagdili sa mga menor de edad nga ubos sa 18 anyos sa paglaruy-laroy sa kadalanan gikan sa alas 10 sa gabii hangtod sa alas 4 sa kaadlawon.
Ang menor de edad nga makalapas sa ordinansa dad-on ngadto sa barangay hall ug pahibaw-on sa barangay tanod ang ilang ginikanan o guardian aron ipakuha sila. Mao kini ang first offense. Papirmahon ang ilang mga ginikanan nga di na pagawson ang ilang mga anak sa gisitar nga mga oras.
Sa ikaduhang higayon, ang mga ginikanan patambungon og parental seminar, samtang sa ikatulo, kinahanglan na sila nga mohimo og community service. Sa ikaupat, ang mga ginikanan ikiha nag kaso sa paglapas sa Republic Act 7610, nga nagprotehir sa kabataan ug nagsilot sa child abuse.