BISAN wala pa gani ka-estudyuhi ang legalidad sa niining ipagawas nga executive order kabahin sa multa sa counterflow sa mayor sa dakbayan sa Sugbo, ang mga mayor sa dakbayan sa Mandaue ug Lapu-Lapu ingon man mismo si Gov. Hilario Davide III nagplano nga i-implementar usab nila ang maong kamanduan sa ilang tagsa-tagsa ka mga local government units. Mao ni giingon sa Tagalog nga “gaya-gaya puto maya.”
Dinhi sa dakbayan sa Sugbo, ang “kanhi laos nga pulitiko” mopagawas sa maong executive order nga nagmando sa mga traffic enforcers nga dakpon ang mga motorsiklo ug ubang mga sakyanan nga mo-counterflow. Unsa man kining counterflow? Ang sakyanan mosubay sa pikas nga lane o opposite direction.
Sama sa akong kanunay’ng gika-ingon nga pabor man ko ani ba nga hingusgan ang pagdakop sa malapason niini. Angay kining kusganon nga iimplementar ingon man ang ubang mga traffic violations. Pero ang akong gisupakan mao ang multa. Kay gawas sa P500 nga multa, ipa-impound pa ang madakpan nga sakyanan balig usa ka buwan. Hinuon, iya nang gitangtang ang storage fee.
Ang pag-impound sa sakyanan naglambigit kini og legal nga aspeto. Ang atong Traffic Code nga gipasar sa Konsiho sa dugay na nga panahon nag-sitar lamang sa multa nga P500. Matod pa sa mga legal minds nga gikinahanglan amendahon una ang maong traffic code idesir mapahamtang ang pag-impound sa mga sakyanan. Ang executive order dili maka-amendar sa ordinansa. Aw, adto ni daugon sa korte kon legalidad ang hisgutan.
Kanang pag-impound sobra ra na nga silot ug dili maki-angayon. Nganong paabton pa man og usa ka buwan kon makalukat dayon ang tag-iya? Kanang mga public utility vehicles sama sa mga taxi, jeepney, vans, Grab ug Uber vehicles maoy makaluluoy. Kon matanggong ang ilang mga sakyanan og usa ka buwan, dako na kaayo nang alkanse sa ilang negosyo. Unsa may sala sa mga operators sa atraso sa ilang mga drivers? Aber? (bobbygnalzaro@gmail.com)