SAKOP sa Philippine Air Force gipatay una sa wa pa sunoga sulod sa iyang sakyanan niadtong gabii sa Enero 31, Miyerkules.
Gugma ang unang nitumaw sa imbestigasyon sa kapulisan kay usa sa mga nalambigit mao ang giingon nga iyang uyab nga nakigbuwag na unta kaniya.
Giingon nga gipusil una si PAF Staff Sergeant Mark Herbert Oberes, 37, minyo, alas 8 sa gabii sa Isla Verde, Corazon Village 2, Barangay San Isidro, dakbayan sa Talisay.
Human niini, gidala ang iyang lawas ngadto sa dakbayan sa Carcar diin nakaplagan ang iyang sakyanan nga nasunog samtang diha sa sulod ang iyang lawas.
Usa sa mga ang suspek ang iyang uyab nga si Resamie Cabañog, 20, tinun-an sa kursong engineering sa usa sa mga unibersidad sa Dakbayan sa Sugbo, taga Isla Verde, Corazon Village 2, Barangay San Isidro, ug ang iyang inahan nga si Edna Cabañog.
Samtang laing upat ka mga suspek mao sila si Joshua Garciano, 22, taga barangay Tungkil, lungsod sa Minglanilla nga uyab ni Resamie; Tomas Isugan, alyas Tommy, lumad nga taga Magsaysay, Guihulngan Negros Oriental; usa ka 22 anyos nga taga Barangay Tungkil ug laing duha ka lalake nga wala pa ilhi ning pagsuwat.
Alarma
Ang kapulisan sa dakbayan sa Talisay unang nakadawat og alarma sa pagpamusil niadtong Miyerkules sa alas 8:35 sa gabii sa sitio Isla Verde.
Sa dihang giadto sa pulis, wa na diha si Oberes ingon man ang mga suspek, apan nakakuha sila og mga ebidensya sama sa usa ka slug ingon man duha ka kabhang sa kalibre .45 nga armas, magazine nga aduna’y unom ka mga bala, 13 pulgadang kutsilyo, pala nga bali na ang kuptanan nga aduna’y lama sa dugo ingon man relo nga nalangkat ang bracelet.
Base sa inbestigasyon, ang mga residente sa lugar nibutyag nga nakadungog sila og duha ka masipang buto dayun padagan sa puti nga sakyanan ingon man brown nga Nissan Almera.
Wa na makahibawo ang kapulisan kon asa mipaingon si Oberes ingon man suspek nga sakay sa duha ka mga sakyanan sanglit wala may midangat sa Talisay District Hospital.
Kagahapon sa kadlawon nakadawat og report ang kapulisan sa Talisay nga adunay puti nga sakyanan, Suzuki Ertiga, nga nasunog, lakip ang lawas sa tawo, sa sitio Tal-ot, Barangay Valencia, dakbayan sa Carcar mga alas 10 na pasado sa buntag.
Ang sakyanan ingon man ang lawas positibong giila nga iya ni Oberes amahan niini nga si Solomon ug asawa ni Oberes nga si Diana positibong miila pinaagi sa kuwentas ug sunog nga senina ingon man sunog nga papelis sa sakyanan nga nakuha sa crime scene.
Relasyon?
Ang inbestigador sa Talisay Police nga si SPO1 Jason Del Campo nakakuha og kasayuran nga si Oberes ug Resamie adunay relasyon.
Ang babaye nakigbuwag na kang Oberes human siya makakaplag kang Garciano, usa ka engineer.
Nasakitan si Oberes, nigamit kini og sa account sa Facebook sa pag-umangkon ni Resamie ug ni-post og di maayong butang nga wa ikahimuot sa ihanan ni Resamie.
Si Oberes mihulga ni Resamie nga kon dili makig-uli ug makigkita kaniya, iyang ibutang sa Facebook ang ilang mga scandal.
Hinungdan nga gipakigkitaan ug miadto si Oberes sa dapit nga nahitaboan.
Apan matod pa, si Edna nga wa malipay sa gihimo ni Oberes mi-hire kang Tommy, kinsa giingong nikuha sa laing duha ka mga kauban sa krimen.
Giingon nga tuyo ni Edna nga bun-ogon lang si Oberes, apan giingong misukol hinungdan nga napusilan ug nabunalan pa sa pala.
Mieskapo
Human sa hitabo, dali nilang gisakay ang lawas ni Oberes sa kaugalingong sakyanan diin ang nagmaniho mao si Garciano, uban sila si Resamie ug Edna.
Samtang ang sakyanan ni Garciano nga Nissan Almera kolor brown gimaniho ni Tommy ug sa laing duha ka mga suspek ug didto gidala sa Brgy. Valencia, dakbayan sa Carcar ug didto na gisunog ang sakyanan.
Sa dihang nasunog na, ilang gibiyaan ug nisakay na silang unom sa Nissan Almera kolor brown nga iya ni Engr. Garciano paingon na balik dinhi sa Sugbo.
Ang sakyanan nahulog mga 10 ka metros sa pangpang.
Matod sa mga imbestigador nga mga residente nakadungog og buto. (dugang taho nila ni GPL, FVQ, AYB)