DUGANG upat ka mga buhatan sa Land Transportation Office sa Central Visayas ang makaimprinta unya og driver’s license cards nga balido og lima ka tuig.
Si Alita Pulga, assistant regional director, nibutyag nga sa sunod semana mataod na ang ekipo nga isumpay sa internet sa mga buhatan sa Mandaue City Licensing Center sa Sugbo, Bais City District Office ug Dumaguete City District Office sa Negros Oriental ug Siquijor District Office sa Siquijor.
Sa kasamtangan, 11 na ka mga opisina sa LTO ang makaisyu og driver’s license cards nga balido sud sa lima ka tuig.
Kini mao ang Cebu City Licensing Center, Carcar City District Office, Danao City District Office, Talisay City Extension Office, Toledo City Extension Office, Lapu-Lapu City Extension Office sa Sugbo; Bayawan City Extension Office ug Robinsons Drivers’ License Renewal Office (Dumaguete City) sa Negros Oriental; ug Jagna District Office, Tagbilaran City District Office ug ICM DLRC (Tagbilaran City) sa Bohol.
Sukad gisugdan ang pag-imprinta sa mga lisensiya nga balido sud sa lima ka tuig niadtong Enero 3 karong tuiga hangtod sa Enero 15, 2018, niabot na og 10,884 ka mga lisensiya ang naimprinta sa lainlaing mga opisina sa LTO 7.
Sa maong ihap, 4,580 ang naimprinta alang sa mga matag adlaw nga transaksyon sa buhatan samtang 6,304 sa backlog.
Matod ni Pulga tinguha nila nga matag adlaw makaimprinta og 250 ka mga license card aron maminosan ang backlog. (SCG)