NISAKA og 25 porsyento ang nakolekta sa Mandaue City Treasurer’s Office (CTO) sa business permit renewal ning tuiga.
Kini maoy gipahibalo ni city treasurer Atty. Regal Oliva sa mga tigbalita atol sa usa ka press conference.
Matod ni Oliva nga anaa sa P99 milyones ang pagtaas sa ilang koleksyon sa renewal sa business permit.
Base sa tax collection report sa CTO, niabot ngadto sa P590 milyones ang koleksyon nga nakuha sa maong buhatan sa renewal sa mga permit kompara sa P489 milyones sa milabayng tuig.
Sa maong report, ang P486 milyones ang nakolekta alang sa business tax karong tuiga, mas taas kini og P67 milyones sa P418 milyones sa milabayng tuig.
“I exceeded my target for this year. Because nag-expect ra ko nga I’ll be collecting a total of P500 million for business taxes,” matod ni Oliva.
Niadtong Enero 25, hingpit na nga nahuman sa iyang buhatan ang renewal sa business permit sa dakbayan diin dul-an sa 10 mil ka mga establisamento ang naka-renew sa ilang permit.
Sa ilang nakita ning tuiga, ang P32 milyones niini gikan sa 8,000 ka mga establisamento nga nakamulta human pakyas sa pagtuman sa ubang mga gikinahanglan sa permit.
Sagad kalapasan sa maong mga establisamento matod pa nga nagkuwang sa pagparehistro sa mga kawani niini alang sa mga benepisyo susama sa PhilHealth, SSS, Pag-ibig ug uban pa. Samtang ang uban pakyas sa paglukat sa sanitary, environmental ug fire safety permit.
Nanawagan si Oliva sa tanang mangbubuhis nga mobayad sa tukmang panahon. (JPP)