MANAG-UYAB nga mga suspek sa pagpatay sa usa ka sakop sa Philippine Air Force gusto nga mamahimong state witness, ningduot sa inahan sa babaye nga maoy mastermind sa krimen.
Nanghunaw na sila si Resamie Cabañog ug Joshua Garciano nga duna silay kalabutan sa krimen kay ang nagplano mao si Edna Cabañog, kinsa wa pa madakpi human makasibat ngadto sa Negros Oriental uban sa laing mga suspek.
Ang kapulisan niingon nga magdepende lang unya kini sa korte samtang padayon silang nanawagan kang Edna sa pag-surrender aron limypohan ang iyang ngan.
Si Supt. Malu Cunag, hepe sa Talisay Police Station, nibutyag nga ila nang gipahiling ang dugo nga nakuha gikan sa kutsilyo kon iya ba kini ni S/Sgt. Mark Herbert Oberes, ingon man ang slug ug kabhang sa bala sa crime scene.
Gibutyag ni Cunag nga si Garciano, inabagan sa iyang abogado, nihimo nag extra judicial confession nga nagsulti sa tanang hitabo ug miduot sa inahan ni Resamie nga si Edna nga maoy nagplano sa tanan ug wa sila masayod sa dautang tinguha niini kang Oberes.
Wa siya masayod kon mohimo ba usab og extra judicial confession si Resamie. Miklaro nga ilang pasakaan og kaso ang unom ka mga suspek ug naa sa korte ang pagdesisyon kon mahimo ba silang state witness.
Gibutyag ni Cunag nga kasong murder ang ilang ipasaka apan sa kasong arson, adto na kini sa kapulisan sa Carcar City.
Gisaysay
Si Garciano, sa interview sa Superbalita Cebu, niklaro nga di pa siya engineer kay mokuha unta siya og board exam karong Nobiyembre.
Matod niya nga uyab sila ni Resamie sud sa usa ka buwan, samtang didto na siya nagpuyo sa balay niini.
Iyang gibutyag nga wa siya makahibawo sa plano ni Edna tungod kay ila ra unta nga pakigkitaan si Oberes aron sila magkaestorya bahin sa hulga niiini kang Garciano.
Sa lahing interview sa Superbalita Cebu, gibutyag ni Resamie nga tinuod uyab sila ni Oberes sulod na sa lima ka buwan, apan iya nang gibuwagan human siya masayod nga minyo ug niadto sa ilang balay ang asawa ni Oberes ug inahan niini.
Matod niya nga human niadto, naglikay na siya ni Oberes apan ang airman magsige og text.
Tungod sa hitabo naglagot og maayo ang iyang inahan ug gipaundang siya sa pagpatungha sa kursong civil engineering, diin anaa na siya sa 3rd year college.
Human niadto, nigamit na og laing-laing account si Oberes ug bisan unsa na lang ang gi-post niini nga naglagot usab ang iyang inahan.
Iyang giangkon nga gihulga siya apan di kay ipagawas ang scandal tungod kay wa silay video kon di gihulga siya nga adunay dautang mahitabo kang Garciano kon di makigkita ug makig-estorya kaniya.
Nisamot ang iyang kahadlok sa dihang nakit-an si Oberes sa iyang ig-agaw nga didto sa ilang lugar kuyog ang duha ka mga lalake.
Niadtong Miyerkules pasado alas 5:00 sa hapon, nanawag na usab si Oberes kaniya ug niingon nga makigkita.
Apan diha ang iyang inahan nakadungog, nimando kini kaniya nga ilang pakigkitaan alas 9:00 sa gabii.
Sila nagsabot nga magkita sa nahitaboan sa Isla Verde Corazon, Village-2, Barangay San Isidro, dakbayan sa Taliay.
“Nakadungog man akong mama naa sa balay mao to kitaon namo si Mark para maghusay. Silang upat (laing mga suspek), dili manghilabot, mohunong na og post maong nisugot mi nga among kitaon,” matod ni Resamie.
Apan wa sila masayod ni Joshua nga adunay dautang giplano ang iyang inahan batok ni Oberes.
Sa dihang niabot si Oberes, kalit ang hitabo, nitunga ang iyang inahan kuyog na ang tulo ka mga killer ug didto nahitabo ang krimen.