GIPAKLARO sa Philippine Drug Enforcement Agency (PDEA) Davao nga ang listahan sa mga tawo nga nalambigit sa gidiling druga nga miabot sa ilang buhatan ug bisan sa buhatan sa kapulisan gikan kana sa mga barangay officials.
Kini ang gibutyag ni PDEA-Davao director Antonio Rivera human dunay mga residente nga mireklamo dihang nalakip ang ilang mga pangalan nga gipang-Tokhang sa kapulisan bisan og mga tawo nga naglubog na sa banig gikan sa dugay na nga balatian.
"Kung naay miabot sa amoa nga listahan, kana gikan sa atong mga barangay officials kay sila mismo ang nasayud kung kinsa ang nalambigit sa druga sa ilang barangay," ingon ni Rivera nga nahinabi sa mga tigbalita.
Una niini, diha'y usa ka residente sa Gravahan, Barangay Matina Crossing ang nagpaabot og reklamo sa mga tigbalita human gi-Tokhang sa kapulisan ang dugay nang naglubog sa banig nila nga kabanay.
"Ang barangay ang nag-validate niini, so kung unsay maabot sa amoa subayon nato, subayon sa kapulisan," dugang niya.
Gipamatud-an sab sa reklamante na sa wa pa maglubog ang iyang kabanay wa sab kini nalambigit sa gidiling druga.
Hinuon, nagpasalig ang opisyal nga mahatagan kini'g sulosyon diha sa barangay level aron limpyo ug siguradong listahan na gayud ang moabot ngadto kanila.