MALAMPUSONG migraduwar sa siyam ka adlaw nga training ang mga personahe sa Bureau of Fire Protection (BFP) nga diri gipahigayon sa Davao.
Sumala ni BFP-Davao director Wilberto Rico Neil Kwan Tiu nga di lamang mga personahe sa BFP-Davao ang misalmot sa siyam ka adlaw nga training apan lakip na ang naa sa ubang rehiyon.
Giingon sa opisyal nga mokabat sa 400 ka mga BFP officials, fire volunteers ug mga responders ang misalmot sa training diin bansayon sila sa mga nagkadaiyang pamaagi sa pagluwas sa tawo panahon kung dunay sunog.
Gikan pa sa laing nasud ang Firefighters for Christ International kinsa mga batid ug hanas ang mibansay sa mga bombero.
Una ang seremonya sa ilang graduation kagahapon sa hapon, sayo sa buntag niini gipahigayon ang ilang daw practical exam diin dunay mga senaryo sa panghitabo ang gihimo didto sa Crocodile Park.
Mibilib ang mga opisyal sa BFP human ilang nakita ang mga senaryo nga girespondehan sa mga migraduwar, sama sa natigayong sunog sa lasang diin naay tulo ka mga balay ang nadamay, sakyanan nga aksidenteng misilaob sa kalsada ug ang pag-rescue kung dunay natigayong pagkalunod sa usa ka sakyanang pantubig.
Gituyo kini aron mas mapalambo pa ang ilang abilidad sa pagresponse sa sunog labi na sa mga pamaagi paunsa i-rescue ang tawo nga na-trapped sa sunog.
Gawas sa ilang paghatag og training sa mga bomberong langyaw, nag-donate sab sila og mga ekipo aron magamit sa BFP-Davao.