DIHANG akong gi-post sa Facebook ang balita kabahin sa pag-clamp sa mga sakyanan sa upat ka mga konsehal – tulo niini mga BOPK ug usa ka Barug Team Rama – nikomentaryo si Mam Lourdes Barcenas kabahin sa illegally parked nga mga sakyanan sa mga pulis.
Mao kiniy hinungdan sa trapik diha sa RR Landon, kining dalan nga nag-uwang sa Camp Sergio Osmeña ug Cebu Normal University (CNU).
Iya na ning gireklamo sa kapulisan ug CCTO apan way nahitabo. Tan-awon nato human niining paghisgot nato sa atong Kulom, post sa Facebook, ug pag-forward sa mga higalang duol kang Mayor Tomas Osmeña.
Ang mga opisyal sa PNP (kay kinsa man diay ang maka-afford og mga sakyanan sa PNP gawas sa mga opisyal) angay mopakitag maayong ehemplo sa publiko.
Pederalismo
Bisan og wa pa maporma ug gilalisan pa ang gilauman nga bag-ong Batakang Balaod nga alang sa pederalismo, nagsugod na sa pagbulhot ang kampanya alang sa pederalismo dinhi sa Sugbo.
Gisugdan kini sa miaging Enero 27 didto sa lungsod sa Cordova nga balwarte ni Secretary Addy Sitoy uban sa iyang anak nga si Mayor Therese Sitoy-Cho nga maoy lider sa Cebu Movement for Federalism (CemFed).
Ang CemFed inisyatiba ni Mayor Aljun Diamante sa Tuburan nga naghisgot lang karong bag-o nga ang maong kalihokan kalambigit sa mas lapad pa nga kampanya sa Visayas, Mindanao, ug sa Luzon ubos sa National Movement for Federalism nga gipangulohan usab ni MMDA chairman ug kanhi rebel general Danny Lim.
Sundan kini karong Pebrero 10 anha sa Syudad sa Naga pinangulohan nilang Kong. Samsam Gullas, kanhi Mayor Val Chiong ug iyang anak nga si Mayor Kristine Chiong.
Atong nasabtan nilang Diamante ug Chiong nga uyon sila sa pag-usab sa politikanhong sistema sa nasud kay makapalig-on sa local autonomy ug sa mga ekonomikanhong benepisyo sa rehiyon kon di na kinahanglang moadto pa sa imperial lords sa Manila ang bagang bahin sa pundo dinhi sa atua.
Bisan pa sa sentimento batok sa giingong Imperial Manila, lakip sa plano sa grupo mao mismo ang paglusad og chapter sa Manila, nagkanayon si Kid Cañeda sa CemFed ug NamFed.
Term limits?
Makadasig nga kining maong grupo mas nagtutok sa pederalismo ug mga kaayohan niini kay sa pagduso sa pagpataas sa term limits sa mga local ug national nga mga opisyal.
Nakahibawo na kita nga sa kasaysayan sa pag-usab sa Batakang Balaod, wala makabwelo ang mga miaging paninguha nga usbon ang 1986 Constitution tungod sa kahakog sa mga kongresista nga gustog mas taas nga term limits. (anol_cebu sa Twitter)