NAKAANGKON og samad sa iyang ulo hinungdan sa iyang kamatayon ang 64-anyos nga babaye human siya maligsi sa usa ka tourist van kagahapon sa buntag sa national highway sa Barangay Montañeza, lungsod sa Malabuyoc.
Ang biktima naila nga si Gaudencia Teopiz, residente ra usab sa maong barangay, nga giingon nga nadaro pa sa van dihang nabanggaan kini pasado alas 9:00 sa buntag.
Matod ni PO3 Sem Inehao sa Malabuyoc Police Station, nga gikan sa lungsod sa Oslob ang van nga gimaneho ni Argie Fortun, 22, kinsa paingon unta sa lungsod sa Moalboal sakay ang tulo ka pasahero.
Dugang ni Inehao nga base sa pamahayag sa mga nakakita sa insidente, nilabang si Teopiz sa national highway dihang naabtan siya sa van ug naligsan kini.
Giingon nga adunay gipalit ang ginang dihang nahitabo ang aksidente. Nadala kini sa MJ Cuenco Hospital sa Malabuyoc apan gideklarar nga dead-on-arrival.
Si Fortun, taga Gorordo, dakbayan sa Sugbo, natanggong sa prisohan sa Malabuyoc ug mag-atubang og kasong reckless imprudence resulting to homicide.
Samtang ang van nga aduna’y temporaryo nga plate number nga 070110, anaa pa karon sa kustodiya sa kapulisan.