Oberes nakadawat og daghang hulga: misis

GIBUTYAG sa banay ni S/Sgt. Mark Herbert Oberes, sa­kop sa Philippine Air Force, kinsa gipatay sa wa pa sunoga sulod sa iyang sak­yanan niadtong Enero 31, nga nakadawat na og mga pagpang­hulga ang biktima sa milabayng buwan.

Kagahapon sa hapon, niatubang mismo ang asawa ni Oberes nga si Diana ug igsuon niini nga si Bert Padilla sa mga sakop sa media.

Si Diana ug Bert nagkana­yon nga adunay mga hulga nga nadawat si Oberes.

“Kon moingon man gud nga love triangle ang motive, we believe it’s more than that, it’s beyond that. Naay personal grudge ang mga suspek base sa among nakuha nga mga information sa conversations, chat logs, SMS exchanges nga naa didto makita naay personal grudge ang suspek. Naay threat si Kuya Mark gikan kang Joshua Garciano, and Edna Cabaño,” ni Bert sa mga tigbalita.

Si Garciano kasamtangang u­­­yab ni Resamie Cabañog nga usa sab sa mga suspek, samtang si Edna maoy inahan ni Resamie.

Dugang niya nga nahibawo na sila sa relasyon ni Resamie tali ni Oberes nga nagsugod mga Hulyo sa milabayng tuig ug giingong nahuman niadtong Disyembre.

Napasakaan na'g kasong murder ang unom ka gituo­hang mga suspek sa Talisay City Prosecutor’s Office niadtong Biyernes.

Sumala pa ni Bert batok sa pasangil ni Resamie nga di kadawat sa panagbuwag si Oberes, nga hinimu-himo lang kini nga istorya.

“We believe that’s a made-up story. It’s for them to provide proof. Base sa na-retrieve nga pictures and exchange (of messages), walay pictures nga nude and obscene in nature. Naa mi mga screenshots sa death threat ni Joshua, makatilaw lang ka, Bay, gamay lang atong kalibu­tan, Bay,” kutlo niya sa gii­ngong text messages.

Gisalikway sab nila ang pa­sangil sa kampo sa mga suspek nga si Oberes maoy nang­hulga kanila.

Nasuta ning mantalaan nga si Oberes ug Resamie “business partner” sa ilang giapilan nga networking ug ang inahan ni Re­samie adunay utang nga P50,000 kang Oberes sa iyang ne­gosyo nga kan-anan nga anaa kilid sa contruction site sa Talisay.

Giunsa pagkaila?

Nagtuo si Diana nga nagkaila iyang bana ug si Resamie niadtong Abril sa milabayng tuig apan wa sila magkakita, kini base sa text messages sa duha sa Messenger ug sa cellphone.

Giimbitar pa ni Oberes si Resamie sa Bantayan niadtong Mayo apan wa nisugot ang suspek sanglit wa pa sila magkita sa personal.

Pagtuo ni Diana nga nagkakita ang duha sa dihang namiyembro sa networking ni Oberes si Resamie niadtong Hunyo 13. Na-recruit sa biktima ang suspek pinaagi sa Facebook.

Nakita ni Diana sa perso­nal si Resamie sa duha ka mga kalihukan niadtong Hulyo sa milabayng tuig: kalihukan sa networking company didto sa Carcar niadtong Hulyo 13 ug kasal sa higala niadtong Hulyo 22, maong di kombinsido si Diana sa pasangil ni Resamie nga niabot pa og duha ka buwan ilang relasyon usa pa kini nahibawo nga minyo si Oberes.

Niadtong Hulyo 6, na-wrong sent si Oberes sa iyang asawa og text nga para unta ni Resa­mie kinsa iyang gitawag nga “love” niadtong tungura.

Si Diana nidugang nga na-wrong sent sab ka usa si Resa­mie og text kaniya nga para unta sa iyang bana maong gikomprontasi kini niya.

Si Resamie ug Oberes na­kit-an pa sa kauban sa trabaho ni Diana nga nangaon sa kan-anan sa Talisay niadtong Nobiyembre maong niadtong Nobiyembre 14, giadto ni Dia­na ug ugangan niini si Resamie sa ilang balay sa Talisay ug nihangyo nga undangon ang ilang relasyon ni Oberes.

Nanghuwam

Si Edna, matod pa, nanghuwam ni Oberes og P50,000 a­­lang sa kan-anan niini kilid sa gitukod nga mall sa Talisay.

Dugang ni Diana nga nipahuwam ang iyang bana kang Edna niadtong Agusto tungod kay dugay ang pag-release sa len­ding apan nikondisyon kini nga ipauli ang salapi inig Nobiyembre tungod kay pista sa Opon.

Pag-abot sa Nobiyembre, na­ningil si Oberes kang Edna apan buot lang ni Edna nga tubo maoy ilisan apan wa nisugot niini si Oberes.

Nitug-an si Diana nga wa siya mahibalo nga nagpautang ang iyang bana sa inahan ni Resamie hangtod sa milabayng buwan.

Nakadawat na og mga pagpanghulga si Oberes gikan sa Enero 2 ngadto sa 4.

Sa ikaduhang semana sa Enero, nagsige na og pani­ngil si Oberes sa utang ni Edna, apan wa gyud kini bayari.

Kalabot sa taho nga buot ni Joshua ug Resamie nga mahimong state witness batok ni Edna, ang tubag sa kampo ni Oberes nga huwaton una nila ang resulta sa imbestigasyon.

“Huwaton ang resulta sa imbestigasyon kay naa mi nahibaw-an nga involve gyud silang duha, we cannot just let them go o unsa,” ni Padilla sa mga tigbalita.