GIPAKITA sa usa sa nanag-unang marathoner sa Sugbo nga si Rafael Pescos kon unsa kalig-on ang iyang tuhod dihang mitali kini og personal best sa iyang pagdagan sa men’s 42K event sa 7-Eleven Run Series-Cebu leg kagahapon sa Cebu Business Park.
Si Pescos, kinsa maoy ace runner sa Spectrum Runners Club, midagan sa iyang ikalimang sunodsunod nga long distance race sulod lang sa lima ka mga semana apan wala kini nakitaan og kaluya.
Gihuman ni Pescos ang lumba sulod sa 2:37:39 segundos aron mahimong labing unang Pinoy nga runner nga nakataak sa finish line sunod ni Kenyan Joseph Mururi, kinsa mitali og 2:36:16.
Si Azlan Pagay maoy ikaduhang Pinoy nga nakaabot sa finish line sa oras nga 2:47:15, ikatulo si Paul James Zafico (2:52:46).
Sa interbyu, nagkanayon si Pescos nga kini nga lumba mao gyud ang iyang gipunterya gumikan kay tinguha niyang makadagan pagbalik sa international race.
Ang mopatigbabaw sa Cebu, Davao ug Manila legs ning maong lumba gastuhan sa 7-Eleven aron makasalmot og international race sa Asya.
Si Lizane Abella, kinsa sakop sab sa Spectrum Runners Club, maoy midaog sa women’s 42K pinaagi sa dominanteng oras nga 3:20:06, una og 18 minutos sa nagsunod kaniya.
Naa sa ikaduha mao si Marie Stephan Jayson (3:39:57) ug ikatulo si Ivy Christine Muscosa (4:11:33).
Sama sa gilauman, midaog si Olympian Mary Joy Tabal sa women’s 21K sa iyang pagbalik og dagan gikan sa duha ka mga buwan nga pahuway.
Ang 29th Southeast Asian (Sea) Games gold medalist mioras og 1:23:07.
Nagsunod kang Tabal mao sila si Ruffa Sorongon (1:27:57) ug Aileen Tolentino (1:30:31).
Gipasabot ni Tabal nga tipik lang kini sa iyang regular nga pagpangandam. Kapin sab sa usa ka buwan nga wala nag-training si Tabal human sa kamatayon sa iyang amahan, 22 ka mga oras sa wala pa niya nadaog ang iyang ikalimang sunodsunod nga titulo sa National MILO Marathon sa miaging duha ka mga buwan. (RSC, ESL)