PATAY ang mag-amahan human gipamusil sa wa pa mailhing mga mamumuno alas 4 sa kaadlawon kagahapon didto sa Sitio Igang, Barangay Palma Gil, Talaingod, Davao del Norte.
Sumala sa impormasyon gikan sa Eastern Mindanao Command (Eastmincom), gipamusil ang mag-amahang Datu Banadjao Mampaundag ug Jhonard Mampaundag sud sa ilang balay sa Brgy. Palma Gil.
Giingong tinagalog ang inistoryahan sa mamumuno kinsa nagpaila nga mga sundalo nga misulod sa balay sa mga biktima dayon gipangpusil ang mag-amahan.
Ang hitabo gikumpirma ni Division Public Affairs Office (DPAO) chief Captain Jerry Lamosao sa 10th Infantry Division apan gihimakak niini ang nagpailang sundalo.
"May nangyaring shooting incident at nandoon na ang tropa natin para habulin ang mga salarin," ingon ni Lamosao kinsa wa mituo sa alegasyong militar ang napusil sa mag-amahang tribal leaders.
"Accordingly, unidentified Tagalog-speaking NPA Terrorists posing as soldiers entered their house and murdered the two tribal leaders," tipik sa impormasyon nga gipagula sa Eastmincom kagahapon sa buntag.
Ang mga medical personnel gikan sa Talaingod on board sa ambulance aron hatagan og assistance ang mga biktima apan mihunong sila human madungog ang mga buto sa gituohang Improvised Explosive Device (IED).
Gibutyag sab ni Lamosao nga samtang tua pa ang mga patay nga lawas sa mag-amahan kagahapon sa buntag, naa pa ang mga NPA sa palibot nga andam mohimo og pagpang-ambush ug posibleng mopabuto og IED ugaling dunay moresponde nga tropa sa militar sa dapit.
Hinuon, kagahapon sa udto nasulod sa militar ang Sitio Igang ug nadala ang patay nga lawas sa mag-amahan sa usa ka lokal nga punerarya sa lungsod sa Talaingod.