DUMAGUETE CITY – Malampuson ang tulo ka adlaw nga Regional Associaton of Development Information Officers (RADIO-7) convention ug 1st InfoTourism Adventure Race nga gitambongan sa Information ug Tourism officers sa upat ka probinsya sa Cebu, Negros Oriental, Bohol ug Siquijor nga gipahigayon sa Coco Groove Beach Resort sa San Juan, Siquijor sa milabayng Oktubre 28 hangtod 30.
Gadala sa tema nga “Bridging Information and Tourism Through Social Media” ang kalihokan diin dul-an sa usa ka gatos ka information ug tourism officers ang mitambong ug nakigtigi sa gihimong lumba ug sack race sa Coco Groove beach, swim relay sa San Juan swimming pool, paghimo og lana sa Barangay San Antonio, Siquijor unya pagluto ug paniudto sa Triad, Larena.
Ang mga partisipante nakat-on usab paghimo og pan bisaya nga giluto sa pugon nga gipahigayon sa lungsod sa Enrique Villanueva, pagtanom og mga kahoy ug bakhaw sa Salagdoong ug pagbisita sa Cambogahay Fallls ug Balete Tree and Spring.
Pinangulohan sa event coordinator nga si Vince Escario, tourism consultant sa lungsod sa Bantayan, Cebu, ang gipahigayon nga InfoTourism Race nagpakita sa mga maanindot nga lugar sa isla sa Siquijor nga gidayo na karon sa mga turista.
Usa sa mga dinapit nga mamumulong gikan sa Smart Communication si Smart Public Affairs Visayas Mindanao Senior manager Maria Jane Paredes diin mipaambit mahitungod sa Social Media and Tourism:The Smart Way.
“Digital economy is inevitable, we just have to embrace it,” matod ni Paredes.
Mga blogger gikan sa Cebu Blogging Community nga mikuyog ug misaksi sa usa ka adlaw nga adventure race, mihatag og assessment ug video presentation sa mga panghitabo atol sa gipahigayon nga adventure race challenge. PIA