MGA sakop sa media nga taga Bohol ang unang nakahibawo nga moanhi si Presidente Rodrigo Duterte tungod sa dakong tigum sa mga mayor sa Visayas ug Mindanao karong Lunes.
Usa pa ka adlaw ang milabay dihang nakakuha kog kopya og memorandum dikan sa Department of Interior and Local Governments (DILG) kabahin sa maong tigum.
Hinuon wa maghisgot ang maong DILG memorandum kon unsay ilang hisgutan. Basin kabahin kini sa kampanya sa gidiling drugas.
Pederalismo
Atong pangagpas nga hisgutan sab kini kampanya alang sa pederalismo labi na nga bag-o lang natudlo ang mga sakop sa constitutional committee nga motuon sa atong Batakang Balaod ug molagda og draft constitution alang sa pag-uban sa atong sistema padung sa pederalismo.
Basta ang atong dugang nabal-an kay nianhi sa Sugbo sa miaging Biyernes ang usa sa sinaligan ni Presidente Duterte nga si Cabinet Secretary Jun Evasco alang sa usa ka closed-door meeting uban sa mga 70 ka lider sa Kilusang Pagbabago (KP) sa tibuok Visayas.
Gawas sa pagpadayon sa ilang proyekto nga “Biyaya ng Pagbabago,” naghisgot sab si Cabsec Evasco kabahin sa mga kalamboan karon sa kampanya alang sa pederalismo ug sa panginahanglan nga mangandam ang Kilusang Pagbabago alang niini.
Dayon, nagtakda og dakong kalihokan ang District 1 ubos ni Kong. Samsam Gullas, Mayor Aljun Diamante sa Tuburan, ug kanhi mayor Val Chiong sa Naga alang sa pederalismo karong Sabado.
Ilusad ang Cebu Movement for Federalism (CemFed) sa distrito duha ka adlaw nga di pa moanhi si Presidente Duterte.
Malasakit
Ug giimbitar ang presidente sa opisina ni Presidential Assistant for Visayas Mike Dino alang sa paglusad sab sa gitawag og Malasakit Center diha sa Vicente Sotto Memorial Medical Center (VSMMC).
Ato man gung nakita nga functional na ang maong Makasakit Center ug nanghinaot kita nga makatabang kini sa atong mga kaigsuonan nga wala intawoy kwarta. Mas nindot kon di kini magamit alang sa politika.
Nakasuroy man gud ko sa VSMMC sa miaging semana kay ni-avail ko sa serbisyo sa ilang Wellness Center nga mas nindot pa sa mga pribadong medical testing center.
Nganong nakaingon ko nga nindot? Nalipay ko kay human sa akong blood test ug sa 10 ka oras nga fasting, awtomatik nga dunay andam nga pamahaw.
Kining klase sa serbisyo wala sa mga pribadong mga sentro. Kinahanglang mogawas pa ka sa mga duol nga fast food aron makapamahaw.
Hinuon, makasabot kita nga bag-o pa kining maong mga serbisyo sa VSMMC. Mas maayong dunay mga directional signs aron di ta masaag. Dako-dako baya ang maong hospital. Sama nako nabawo ko sa pagpangita sa admin cashier. (anol_cebu sa Twitter)