BILIB unta ko sa mga semi-finalist sa Tawag ng Tanghalan sa noontime show nga It’s Showtime.
Pero mao lagi, kon kinsa tong pinakaluoy og estorya mao gyuy makalusot.
Kon wa lay apil ang text votes, di gyud unta dapat makasud si Tuko delos Reyes kay nasayup man siya og sud pagkanta niyag “Ang Buhay Ko” sa Asin. Mas duna lang siyay karisma kumparar sa ubang semi-finalists ug mas luoy siya og kaagi.
Pero kon kinantahay lang mas maayo si Ato Arman niya, katong nikanta og The Flame (Cheap Trick) nga gihatagan og standing ovation sa mga hurado. Bisan si Charles nga maoy No. 1 sa mga hurado okay sad to.
Basin mapareho n’ya na si Tuko ni Noven Belleza nga walay diction mokanta og English. Paminawa ang kanta ni Noven sa Wish FM sa YouTube, nagkayamukat ang diction.
Grand winner gani ka, duna gyud kay diction. Pero daan na kong nagduda nga mosud gyud si Tuko tungod lagi sa iyang karisma. Sakto tong comment sa usa ka Netizen nga dapat 25% lang sa text votes ug 75% sa judges. Nahug na siya nga popularity contest, dili singing contest.
Record bars
Karon ra ko nakaamgo nga nahurothurot na diay og kawala ang mga record bar sa mga mall, sama atong Odyssey ug Radio City. Kahinumdom pa mo aning mga tindahana?
Ang nahibilin na lang ang Astrovision sa Ayala, pero menus na kaayo silag stock, sagad mga VCD ug DVD na lang.
Sa miaging semana, nangita ko og mga karaang CD album sama sa The BeeGees ug CSNY sa mall. Karon ra ko nakaamgo nga wala na diay kay mapalit ani sa mga tindahan.
Hingpit na bang namatay ang industriya sa recording? Mao na ang mga kanta ron dili na ta kaila ug dili na ingon ana ka nindot kumparar niadtong dekada `70, `80 ug `90?
CD Collection
Lahi gyud kon duna kay album collection sa imong paboritong artist. Ako duna pa koy plaka nilang Yoyoy Villame, Max Surban, Martin Nievera ug Basil Valdez. Duna sad koy cassette tapes sa mga paborito nakong artists.
Pero mas daghan kog collection sa CD, mga dul-an 1,000, sama sa greatest hits sa Chicago, America, Beatles, Toto, Earth Wind and Fire, England Dan and John Ford Coley, Scorpion, Stevie Wonder, Bread, James Taylor, Michael Jackson, Michael Bolton, Michael Franks, Kenny Rankin, Kenny G, Spiral Starecase, Platters ug uban pang iconic artists.
Kon avid fan ka, mo-support ka sa imong paboritong artist. Apan sad to say, karong panahona, maihap na lang ang mamalit og orig nga CD. Hasta OPM gani, wa na kaayoy hits ang mga bag-ong singer.
Sa akong tan-aw, layo ra nang 10 katuig, mawala sad ning mga CD ug DVD, sama sa pagkawala sa mga plaka, cassette tapes, Betamax ug VHS.