NAGKATAPOK ang mga karaang players sa Sugbo niadtong Biyernes sa gabii nga namilar sa haya ni one-time Olympian coach Joaquin “JakeRo” Rojas diha sa St. Peter Funeral Homes-Imus Branch ning dakbayan.
Dunay mga kauban ni coach Jake kaniadto sama nila ni Julian Macoy, Danny Duran, Eustuquio Tan ug Joel Cenabre ang nalakip sa mga tapoktapok pero ang kadaghanan gyud kadtong mga players nga nakaagi ubos sa pag-coach ni coach JakeRo.
Usa na niini si Freddie Abuda, kinsa nakaduwa sa PBA sulod sa 12 ka tuig ug karon nahimo nang usa ka deputy coach sa darling of the crowd Barangay Ginebra.
Si Abuda, ang kanhi Criminology student sa Cebu Central Colleges (CCC) nga karon mao na ang University of Cebu, daling midalikyat bisan sa makadiyot lang, dinhi sa Sugbo, sa dihang iyang nahibaw-an ang kamatayon ni coach Jake niadtong Martes.
Bisan tuod sa kahamubo lang sa kahigayona, dako kaayo ang pasalamat ni Abuda ngadto ni coach JakeRo ug iyang giangkon nga dako siyag utang kabubut-on niini kay kon dili pa tungod ni JakeRo nga mao gyud ang nagmanso kaniya, wa unta siya sa PBA karon ug di unta usab nya makab-ot ang iyang mga damgo nga sa umaabot nga mga adlaw makapatong siya sa PBA.
Si Ramon Fernandez nga giila usab nga “El Presidente” sa unang professional basketball league sa Asia ug usa na karon sa mga commissioner sa Philippine Sports Commission (PSC) nagkanayon usab nga si coach Jake maoy nagsilbi niyang inspirasyon niadtong bata pa siya.
Sa matag higayon nga mahiuli si coach JakeRo sa ilang dapit, moduyog si Fernandez sa uban niyang kahigalaan nga mosugat ug maikag nga motan-aw sa higayon nga moduwa kini sa ilang dapit.
Si Abuda ug Fernandez, sama kang coach Jake, lumad nga taga Leyte apan dinhi sa Sugbo naugmad ug napahanas ang ilang tagsatagsa ka mga karera sa natad sa basketball.
Human moretiro pagduwa, si JakeRo, nahimong headcoach sa UV sulod sa tulo ka tuig, apan didto siya magdugay sa Cebu Central Colleges nga karon mao na ang University of Cebu.
Kagahapon, ang 78 anyos nga kanhi Olympian, gihatod na ngadto sa iyang lubnganan human masugamak sa sakit nga taodtaod na sab niyang gihambin.
Dinhi man tuod nanimuyo sa Sugbo sa hataas nga panahon, apan ang iyang yutang natawhan didto sa Maasin, Southern Leyte maoy nahimo niyang hingpit nga kapahuwayan.
Si coach Jake maoy usa sa mga orihinal nga player sa PBA diin iyang nakauban ug nasuod kaniadto sila si Robert Jaworski ug Francis Arnaiz ug uban sa Toyota team.
Nalakip siya sa Philippine team nga mi-qualify sa 1968 Olympic sa Mexico City diin iyang gikauban mao sila si Caloy Loyzaga. Apil usab siya sa 1966 RP Team sa Asian Games, 1969 World Basketball, ug Mr. Basketball sa PBA.
Karon hingpit nang mobiya si JakeRo, ang usa sa akong higala ug paborito nga coach.
Permi ko siyang ikatagay niadtong himsog pa ang iyang panglawas, ug pipila usab ka higayon nga mahikuyog ko kaniya uban sa iyang team sa higayon nga nga moduwa kini sa ubang dapit.
Karon wala na siya. Adiyos kanimo, coach JakeRo. Rest in peace, coach. (junmigs0622@yahoo.com)