GIAWHAG sa kampo ni Winefredo Miro ang Regional Special Operation Group (RSOG 7) sa pagpalawom sa ilang imbestigasyon may labot sa kamatayon ni Kapitan Felicisimo “Imok” Rupinta kinsa gibahigan-patay sa lungsod sa Lilo-an.
Sa affidavit nga giduso ni Miro didto sa Cebu City Prosecutor’s Office (CCPO), iyang gihimakak ang pasangil ni Jocelyn Mendoza nga siya maoy mastermind sa kamatayon sa kanhi kapitan nga iyang gihulagway nga usa ka higala.
Gidasig ni Atty. Edgar Gica ang CCPO sa pagtimbangtimbang kon duna bay igong gibug-aton ang kaso nga ipasaka ngadto sa korte aron mapamatud-an nga guilty ang usa ka akusado sa krimen.
Gihulagway ni Miro nga nalipat ang RSOG 7 ug nituo sa pasangil ni Mendoza kinsa maoy kuyog sa kapitan atol sa pagbanhig.
Matod ni Miro nga si Mendoza ang nangita og paagi ug maoy nipahibawo sa RSOG 7 sa ginganlan og Rolando Pacres ug niaghat sa pagboluntaryo sa pag-adto sa kapulisan aron moluwat og affidavit nga siya ang itudlo nga mastermind sanglit adunay P300,000 nga tanyag ang Team Rama.
Gipadayag ni Miro nga gidawat usab sa RSOG 7 ang maong testimoniya bisan og walay lawom nga ebedinsya nga nagtudlo kaniya ug maoy gipagawas sa media ug pagdeklara ngadto sa publiko nga sulbad na ang krimen gumikan sa ilang pagdakop kang Jessie Largo kinsa maoy gitudlo nga gunman.
Si Miro kinsa maoy kanhi operation head sa Office of the City Markets niingon nga ang paggamit ni Jocelyn kang Pacres diin wala siya makaila usa ka pagtabon sa posibilidad nga ang kanhi kapuyo ni Rupinta ug si Pacres maoy nagplano sa pagpatay sa iyang gihulagway nga higala sanglit sila maoy nahibawo sa giingong klase sa trabaho ug panginabuhi ni Imok sa Ermita.
Kini aron makontrola ni Mendoza ang giingong bahandi nga gipanag-iya ni Rupinta nga ilang natigom atol sa ilang pagpuyo sa nanglabay nga katuigan ug ilang mapahimuslan ang pagkontrolar ni Imok sa barangay Ermita.
Matod ni Miro nga giampingan niya ang iyang pagkatawo sanglit gikan usab siya sa politikanhong pamilya sa Ermita aron dili madaot ang reputasyon sa pamilyang Miro.
Iyang gipalanog nga dili niya mabuhat ang pagpatay sanglit iyang gihulagway nga higala sila ni Rupinta ug kon aduna man silay deperensya mao ra ang ilang baruganan ug hinayhinay na silang nagkaduol sanglit nagpatabang kaniya si Rupinta nga mahibalik ang pagsalig kaniya sa BOPK kay gusto siyang mobalhin og grupo. (PAC)