LISOD pod ning gibuhian nga hulga sa mga walhong grupo.
Matod pa, makahimo sila pagpatay sa usa ka sundalo kada adlaw.
Buot ipasabot, 7 ka sundalo kada semana, 31 ka sundalo matag bulan og 365 ka sundalo matag tuig ang ilang patyon.
Hulga lang kini o mahimo gyod kaha nila kining buhaton?
u25cf ● ●
Matod pa, sayon ang pagsulti pero lisod ang pagbuhat.
Dili lisod ang pagsulti nga mopatay sila og sundalo matag adlaw, apan ang pangutana, makahimo ba sila niini?
Kon buhaton nila kini, unsa may mahimo sab sa mga sundalo?
Dunay armas og mga bala ang mga sundalo.
Ang naka-diperensiya sa mga sundalo og mga NPA kay dunay gisunod nga balaod ang mga sundalo nga maoy giila sa mga katawhan samtang ang mga NPA, duna silay balaod nga sila lang ang nasayod.
Samtang dunay gitawag og “rules of engagement” ang mga sundalo, ang mga NPA dunay kagawasan sa paghimo sa ilang gusto buhaton, sila lang ang mag-igo unsaon pagbuhat ang ilang gusto mahitabo.
Duna silay gitawag og mga Sparrow Unit nga mopatay ni bisan kinsa sa bisan unsang oras sa bisan asa nga lugar.
u25cf ● ●
Matod pa sa mga walhong grupo, mahimo kaayo nila kini buhaton pinaagi sa ilang gitawag og “guerrilla warfare” diin mahimo sila nga mopatay pinaagi sa pagbanhig sa mga sundalo.
Mao kini rason nga sayon ra kaayo sila mobuhi og hulga batok sa mga sundalo.
u25cf ● ●
Apan ang nakalisod niini kay nagsalig ang mga NPA sa suporta sa mga tawo.
Kon mawala ang suporta sa mga tawo, mawad-an sila og suporta sa mga kabukiran og sa ubang lugar nga ilang gitagoan. Maglisod sila og pangita og pagkaon kay dili man sila pwede mopalit sa mga merkado kay mailhan unya sila sa kapolisan o mga sundalo.
Maglisod sab sila sa pagpahulay kay kanunay man sila gukdon sa mga sundalo bisan asang dapita sila magtago.
Maglisod sab sila sa pagpatambal sa ilang masakiton o masamdan kay dili man sila mahimo moadto sa health center o sa hospital kay basin mailhan sila.
Lisod kaayo ang kinabuhi sa bukid, matod pa sa usa ka kanhi sakop sa Sparrow Unit.
Lisod ang pagkaon og imnonon, lisod ang pagpahulay kay kanunay ka magbantay og duna bay nagsunod kanimo o nakaila bisan asa ka, lisod ikatulog kay way klaro ang lugar nga katulgan, daghan kaayong lamok, way mainom, way kaligo og mga pipila ka adlaw unya dili ka pwede moadto sa usa ka lugar nga dili ka suheto, matod pa niya.
Og ang nakapait pa gyod niini, dugang pa niya, dili mahimo nga mokuyog o mobisita ka sa imong pamilya kon gusto nimo, dili ka pwede mokontak og cellphone o bisan sulat. Labi nang dili mahimo mobisita ka sa imong pamilya nga nasakit o namatay, dili ka pwede moanha kon dunay birthday, bunyag, graduation o bisan unsa nga okasyon sa pamilya kay tua man ka pirmi sa bukid.
Mao kini ang iyang gisaysay og matod pa niya, wa gyod siya magmahay nga mitalikod siya sa iyang grupo og miapil na og balik sa katawhan.
Kauban niya ang iyang asawa sa dihang nagsulti siya niini kanako.
u25cf ● ●
Kon mahimo kana sa mga NPA, mahimo usab kana nga buhaton sa mga kapolisan o sa mga sundalo.
Kinsa kaha ang unang mahurot kon mahitabo kini?
u25cf ● ●
Magtagbo karong Huwebes sa PICC ang mga piling sakop sa consultative body nga maghimo sa draft para pag-usab sa batakang balaod alang sa usa ka informal meeting.
Mao kini ang unang higayon nga magtagbo sila og mag-ila-ila ubos sa pamunoan ni kanhi Chief Justice Renato Puno.
Posible sab nga maghimo sila sa mga protocol alang sa ilang umaabot nga trabaho.
Apan karon pa lang adlawa, makita na ang kabibo kon hisgotan na ang isyo sa federalismo.
Si kanhi Senate President Nene Pimentel kusog nga molalis alang sa federalismo samtang si kanhi Bohol OIC Governor Victor de la Serna molalis batok sa federalismo.
Apan bisan pa sa maong panaglalis sa prinsipyo, nagpabilin ang katim-os sa ilang panaghigalaay.
Gani, nagkuyog ang duha sa usa ka press conference kagahapon diin ang gihisgotan mao ang mga sagad mahitabo kon magsugod na sila sa ilang trabaho.
u25cf ● ●
Ang nakanindot niini kay dunay gibuhian nga pamahayag si Deputy Speaker of the House Gwen Garcia mahitungod sa pagabuhaton sa maong consultative body.
Magpabilin nga “consultative” ang maong grupo og mahimo nga dawaton o dili nila dawaton sa House ang rekomendasyon sa maong grupo.
Buot ipasabot, sila gihapon sa House ang masunod kon unsay angay mahitabo sa batakang balaod.
Sa dihang akong gipangutana si de la Serna bahin niini, misulti si de la Serna nga walay problema.
Mahimong ilang himoon nga basehan sa panaglantugi sa House ang draft nga gihimo sa consultative body, matod pa ni Gov. Victor de la Serna.