CENTRAL Command mipakagamay lang sa pamahayag ni Jose Maria Sison nga molusad ug pagpamatay og usa ka sundalo matag adlaw ang hit squad sa New Peoples Army tungod sa kamandoan ni President Rodrigo Duterte sa pagdakop sa ilang mga peace negotiator.
Niadtong miaging semana ang kapulisan misikop sa National Democratic Front of the Philippines (NDFP) Peace consultant Rafael Baylosis isip pagsanong sa mando ni presidente Rodrigo Duterte.
Tungod niini si NDFP Founding Chairman Jose Maria Sison mibahad nga dunay himuon nga pagpangatake ang hit squad sa NPA nga gitawag nilang sparrow unit pinaagi sa pagpatay og usa ka sundalo matag adlaw.
Apan alang kang Col. Medel Aguilar, information officer sa AFP Central Command, wa kini nila hatagi og gibug-aton Sison sanglit napamatud-an na kini nila sa milabayng ceasefire nga wala motuman kanila ang mga armadong NPA.
Hinuon di mokompyansa ang kasundalohan ug gani mipagawas og kamandoan ang Centcom sa ilang mga personnel nga magbinantayon sa kaugalingon tungod kay mahimong molusad kini og kinalit nga pagpangatake.
Gipasabot ni Aguilar nga wala nay liquidation squad ang mga rebelled dinhi sa kabisayaan nunot usab sa ilang pagtago-tago sa kabukiran ug maihap nalang usab ang ilang gidaghanon.
Dili usab ni molambo ang gitinguha sa nagpailang leader nga si Sison tungod kay nawagtang na ang abag sa masa sa ilang kawsa.
“Binaliwala lang natin kase palagi nalang yan natin narinig yan, sa message na yun is hindi naman lang pwede nilang takotin ang armed forces o PNP,” matod ni Colonel Medel Aguilar.
Nagtuo ang information officer sa Centcom nga gituyo sa mga rebelde ang maong pamahayag aron hadlokon ang gobyerno ug dili na gukdon ang mga leader niini nga dunay mga warrant of arrest. (AYB)