ABLI na sab ang Davao City ngadto sa laing nasud sa bag-ong rota niini nga direct flight Davao-Kuala Lumpur sa nasud Malaysia diin ang maong biyahe gisugdan na niadtong Disyembre 21, 2017.
Kini nadugang sa 130 destinations sa AirAsia nga gikonsiderang maoy largest low-cost carrier sa Asia diin ang maong biyahe nag-abli sa dugang turismo labi na sa komersyo sa hisgutanang Halal.
Si AirAsia Deputy Group Chief Executive Officer for Digital, Transformation and Corporate Services Aireen Omar nagbutyag sa pamulong niini atol sa DVO-KUL Officiating Ceremony sa Marco Polo Hotel–Davao niadtong Pebrero 1 nga dako og papel sa gobyerno ug turismo sa pagpabilin sa maong rota.
"We appreciate Philippine’s push for increase awareness and availability of Halal-compliant products and services. As we continue to increase connectivity between the communities of Asean (Association of Southeast Asian Nations), it is important that the needs for tourism around this region are also met," ingon ni Omar.
Nabutyag sab ni Omar sa pamaagi sa nasud Japan nga sama sa Pilipinas ang malampusong pagpatuman sa programa alang sa halal-compliant tourism nga nahisgutan sa Asean.
“We can do the same in Asean and I think Mindanao has a lot to offer in this part of the region (Asean) to draw in more tourists from across our 634-million-people-strong Asean,” suma niya.
Ang AirAsia mipasalig nga modugang pa og mga international flights nga ang Davao City maoy mahimong gateway hub sa Southern Philippines.
“We are optimistic that Davao will do very well as a destination and we look forward to work hand in hand with Mayor Sara Duterte-Carpio, the national government and other tourism bodies to grow Davao further,” ingon ni Omar.
Upat ka higayon sa usa ka semana ang biyahe sa AirAsia sa direct flight niini nga Davao-Kuala Lumpur diha sa adlaw'ng Lunes, Martes, Huwebes ug Dominggo.
Ang maong airline company ginganlag World's Best Low-Cost Airline sa annual Skytrax World Airline Awards sa siyam ka higayon gikan tuig 2009 hangtud 2017.