UNOM ka mga ulitawo ang nagpatala sa Tugbok Police Station human alegasyong nasumbagan tumong sa tiyan sa usa ka iladong abogado sa Davao City.
Ang insidente nahitabo alas 11 sa gabii niadtong Lunes didto sa usa ka pribadong tunghaan sa Tugbok District diin ang mga nagreklamo mao sila Christoper Rey Balais Marante, 24, nagpuyo sa Bayanihan, Toril; ug sila Edwin Macian Jr., Neil Camochu, Louie Paran, Darius Rubio, ug Leo Alimasag.
Subay sa blotter nga natala sa Tugbok Police Station, nag-perform ang mga nahisgutan og fire dancing aron mahimong sadya ang programa apan aksidente nga napiskan og aligato (gamay nga kalayo) ang abogado ug dayon nasuko kini.
Sa kasuko sa abogado, giingong nasumbagan niini si Marante tumong sa tiyan ug likod ug giingong gipang-apil sab og sumbag ang lima ka mga kaubanan sa team ni Marante.
"Gipakuha nato og medical certificate ang mga reklamante aron mao to atong basehan sa ilang reklamo," sulti ni Chief Inspector Randy Sambalud, hepe sa Tugbok Police Station, nga nahinabi sa SuperBalita pinaagi sa telepono kagahapon, Pebrero 6.
Dugang ni Sambalud nga subayon sab nila kung dunay closed-circuit television (CCTV) camera sa nahitabo aron masusi ang kinatibuk-ang dagan sa hitabo subay sa reklamo.
"Accordingly, hinay lang god to, murag napikhan lang kay kung naay makita nga mga bun-og ang mga reklamante, mapalihok gyud nato ang reklamo didto sa korte batok sa abogado," dugang ni Sambalud.
Sukad sa pagsuwat ning balita Martes sa hapon, wala pa kabalik ang mga reklamante sa pagdala sa ilang medical certificate sa buhatan sa Tugbok Police Station suma sa hepe sa maong istasyon.
Paningkamotan og kontak sa SuperBalita ang bahin sa abogado ugaling duna nay reklamo nga ipasaka didto sa korte.