KON usa ka sa mamalitay og National Food Authority (NFA) rice, mahibong siguro ka mga nagnihit na kini karon sa merkado.
Kini tungod kay kuwang ang stock sa maong klase sa bugas, butyag sa NFA 7 sa Superbalita Cebu kagahapon.
Lakip nga apektado ang Central Visayas sa problema karon sa NFA tungod kay nagkuwang ang NFA rice.
Matod sa tigpamaba sa NFA 7 nga si Olma Bayno nga sa labing uwahi nga inventory nila sa mga NFA rice sa rehiyon niadtong Pebrero 5, niabot na lang sa 139,000 ka sako ang anaa sa ilahang bodega.
Base sa 15 ka adlaw nga buffer stock nga mandato alang sa NFA kinahanglan og 522,900 ka sako sa NFA rice ang rehiyon o 34,860 ka sako matag adlaw base na usab sa daily rice consumption requirement nila.
Kini nagpasabot nga kon sundon ang DRCR, naa nalang sa dul-an upat ka adlaw ang nahabiling stocks sa NFA rice ang Central Visayas.
Gibutyag usab ni Bayno sa Superbalita Cebu nga nagsugod sila nga wala na mag-release og bugas ngadto sa tanang NFA rice accredited retailer sa pagsugod sa Pebrero.
Gipasabot niini nga usa sa rason kining daghang na-distribute nga sako sa bugas sa nakalabay nga tuig tungod sa sunod-sunod nga kalamidad ug katalagman hilabi na sa uwahing quarter.
Wa pa usab maaprobahe sa NFA council ang request sa rehiyon nga dugang supply ingon man ang importation ug local produce.
Nihit ang ani sa mga mag-uuma sa nasod sa humay niadtong nakalabay nga tuig.
Ug kon mag-import ang nasod, gikan kini sa Vietnam ug Thailand, apan moagi pa sa bidding.
“Sa NFA (Central Visayas) nga inventory low na gyud among stocks, pero in terms sa industry inventory, meaning to say apil na ang commercial ug household plus NFA, enough pa siya for the entire region,” si Bayno dihang nahinabi sa Superbalita Cebu kagahapon.
Aduna’y duha ka klase sa NFA rice nga gibaligya sa merkado, kining labing ubos nga presyo nga P27/kilo diin 25% niini ang broken, ug P32/kilo diin 15-20% niini ang broken.
Gibutyag usab ni Bayno nga ang nahabiling 139,000 ka sako sa bugas sa rehiyon ilang i-reserve sa laing katalagman ug ang order of priority nag-una ang Department of Social Welfare and Development (DSWD), National Disaster Risk Reduction Management Council (NDRRMC), ug local government units.