GIPATUMAN na ang kanselasyon sa dalaw sa Cebu Provincial Detention and Rehabilitation Center (CPDRC) kagahapong adlawa.
Nibarog hinuon ang Kapitolyo sa ilang desisyon sa pagsuspenso sa prebelihiyo sa mga piniriso tungod sa daghang kontrabando nga nakuha atol sa labing uwahi nga greyhound operation.
Taliwala sa pag-reklamo sa mga piniriso sa CPDRC sa giingong dili makiangayong pagsuspenso sa pagpanawat ug bisita sa prisohan, gibarugan sa Kapitolyo ang desisyon niini nga kanselahon ang dalaw.
Matod ni Provincial Administrator Mark Tolentino nga inay nga moreklamo ang mga piniriso mas maayong motabang sila sa gihimo nga paglimpyo karon sa Kapitolyo sa prisohan gikan sa drugas ug uban pang matang sa kontrabando.
Sigun ni Tolentino nga ngayang isumbong sa mga piniriso ngadto sa tagdumala sa CPDRC ang ilang mga kauban o kawani sa prisohan nga nagtinir sa mga butang nga gidili ug maoy hinungdan sa presensiya sa drugas diha sa pasilidad.
Sa nasayran, dul-an sa 30 ka pakite sa gituohang shabu ang nakuha sa greyhound operation sa CPDRC niadtong Biyernes apan alang sa mga inmate, di patas ang pagsuspenso sa dalaw alang sa tanan kay pipila man lang ang nakuhaan sa kontrabando.
Wa pa matino kon kanus-a ibalik ang prebelihiyo sa mga piniriso pagdawat ug dalaw ingun man sa conjugal visits.
Nangayo hinuon si Tolentino sa pagsabot sa mga piniriso ug sa ilang pamilya, niining gihimo karon nga pag-istrikto sa pagdumala sa prisohan dungan sa pagpasabot nga igo lang nilang gituman ang kampaniya sa nasudnong kagamhanan batok sa ilegal nga drugas.
Si Atty. Inocencio de la Cerna, nga niadto sa CPDRC kagahapon, miingon nga nagplano karon ang mga inmate paghimo ug silent protest nunot sa kanselasyon sa ilang visitation rights. Niduso usab siya ug request sa Commission on Human Rights alang sa pagpa-imbestigar niini. (AZDL)