EX-CONVICT gipusil patay sa pulis nga anak sa iyang gipanguyaban nga 83 anyos nga lola niadtong Martes sa alas 8 sa gabii sa Brgy, Looc, lungsod sa Dumanjug, Sugbo.
Si Fabian Libaton, 64, traysikad driver, taga Barangay Kanyuko, Dumanjug, patay human nakaangkon og samad pinusilan sa liog ug dughan.
Samtang kasamtangang gikustudiya sa Dumanjug Police si PO3 Roelito Lawian Tano, 48, minyo, taga Brgy. Looc, Dumanjug, sakop sa Provincial Mobile Force Company (PMFC) sa CPPO nga nakabasi sa Lutopan Detachment, dakbayan sa Toledo.
Si Sr. Insp. Gilfred Baroman, hepe sa Dumanjug Police nga nahinabi sa Superbalita Cebu, nagkanayon nga si Tano tuyo nga misakay sa traysikad nga gimaniho ni Libaton aron iyang ikomprontasi sa barangay hall sa Looc diin sila si Inocencia Tano, 83, motambong husay uban sa barangay kapitan.
Samtang nagdagan ang trisikad, gisukmatan ni Tano si Libaton kabahin sa pagsigeg pamisita niini sa iyang inahan magabii.
Apan nahitabo ang ilang init nga panaglalis hangtud nga mikanaog si Tano sa traysikad.
Sa iyang paglakaw pipila ka metros, giingong iyang nalingian nga mibunot na sa iyang armas si Libaton ug padulong mopusil kaniya hinungdan nga iyang giunhan sa pagpusil.
Si Libaton naigo sa liog ug dughan.
“Sige daw ning biktima pamisita sa inahan sa pulis magabii. Nanguyab daw ni unya nahadlok na daw, na nerbyus (inahan ni Tano) kay hudlaton man” dugang ni Baroman.
Si Baroman nibutyag nga base sa ilang nakuhang kasayuran sa igsuon ni Libaton, nakapatay na kini ug nakaserbisyo na sa bilangoan.
Giingong may pagkaguwatsinanggo si Libaton hinungdan nga nahadlok ang inahan ni Tano, nitug-an sa gihimo niining pagpanghulga sa panahon nga mamisita.
Matud pa ni Baroman, nga sa ilang pag-abot sa lugar, boluntaryong nitahan si Tano, gi-surrender ang armas nga 9mm pistol.
Nakuha nila sa crime scene ang .357 caliber revolver nga may upat ka mga bala nga gipanag iya ni Libaton, tulo ka kabhang sa 9mm pistol ug identification (ID) card sa biktima.