GILANTAW sa mayor sa siyudad sa Digos nga usa ka dakong kalampusan sa tanang opisyal ang nadawat nga pasidungog isip "3rd place Most Competitive Component City" sa Rehiyon 11.
Gitataw ni Mayor Joseph R. Peñas nga igo lang siya mirepresenta sa tanang Digosenues dihang gidawat niini ang plaque sa pag-ila didto sa Grand Regal Hotel, Davao City, di pa dugay.
Si Peñas nagkanayon nga timailhan lamang ang pag-ila sa maayong pagdumala sa tanang opisyal sa dakbayan aron mapatuman nila ang "good governance" ug magpabilin ang transparensiya ngadto sa publiko.
Samtang niadtong Lunes, gitunol sab sa lokal nga gobyerno ang mga bag-ong himan nga makatabang sa Bureau of Fire Protection (BFP) ug City Disaster Risk Reduction and Management Council (CDRRMC) aron madugangan ang ilang kagamitan sa pag-responde sa mga emerhensiya.
Matud sa mayor nga angayang unahon sa maong mga ahensiya ang pagprotekta sa matag kinabuhi sa takna sa kalamidad.
Sa kasamtangan, padayong gipatrabaho sa lokal nga gobyerno ang nagkadaiyang imprastraktura sama sa bag-ong merkado publiko, dugang mga lawak sa tunghaan ug mga kadalanan sa dakbayan.