KANIADTO kining immunization program sa gobiyerno daku kaayog natabang sa atong kabataan. Daghang sakit ang wala makatakboy sa kabataan tungod sa mga bakuna. Karong bag-o dihay anti-flu ug anti-pneumonia vaccination nga gilusad sa atong gobiyerno nga daku kaayog natabang sa atong kaigsuonan, apil na ang mga hamtung.
Apan karon human sa kontrobersiya sa Dengvaxia dili na pabakunahan sa mga ginikanan ang ilang mga bata bisan sa naandan untang bakuna.
Ang Aquino administration mipalit og Dengvaxia vaccine nga balor og P3.5 billion nga alang unta sa sakit nga dengue. Daghang kabataan ang gi-injectionan niining maong vaccine kay nagtuo ang mga ginikanan nga dili na masakit og dengue ang ilang mga anak.
Apan human mabakunahi ang hapit milyon ka mga bata sa tibuok nasud mipahibawo ang Sanofi Pasteur, nga maoy naghimo sa Dengvaxia, nga ang maprotiktahan sa maong vaccine kadto lamang natakbuyan na sa sakit nga dengue ug mograbe ang sakit sa kabataan kon ma-dengue sila human ma-immunize.
Tungod niining maong kasayuran nanga-tarantar ang mga ginikanan sa mga nabakunahan.
Adunay mga tawo nga nagduda nga buot tabunan ang kasal-anan sa Sanofi. Bisan gani ang taga Department of Health (DOH) ug ang ubang mga kanhi opisyal niini gidudahang midepensa sa Dengvaxia. Ila ganing gisaway ug buot pahunongon ang Public Attorney’s Office (PAO) tungod sa paglambigit nila sa Dengvaxia sa kamatayon sa ubang mga bata. Bisan ang pipila ka kanhi kalihim sa DOH daw nahimo nang tigpamaba sa Sanofi.
Hinaut pang ikiha na sa gobiyerno ang Sanofi Pasteur ug ang tanang mga tawo nga may kalabutan sa pagpalit niining Dengvaxia nga inay makaayo nagdala na hinuon og kadaut sa panglawas sa kabataan. Magduda kita nga daku kaayo ang nadawat nga komisyon sa mga tawong mitabang aron gayud madali og palit.
u25cf ● ●
Human sa Executive Order No. 34 nga mo-impound sa mga sakyanan nga mo-counterflow kinahanglang istriktuhon na usab pagpatuman ni Mayor Tomas Osmeña ang City Ordinance 1514 kon Anti-Jaywalking Ordinance.
Kining maong ordinansa nga napasar kapin na sa 15 ka tuig wala hugot nga mapatuman. Istrikto lang ang dakop niini sa Colon st. apan sa ubang kadalanan way kahadlok ang mga tawong molabang sa dalan bisan unsay signal sa traffic light ug bisan gawas sa pedestrian lane. Bisan gani sa mga dalan sa SM City walay respito ang ubang mga tawo nga magpataka lang og labang.
Mao kini makababag sa dagan sa trapiko ug kinahanglang sumpuon. Magpakita usab kini sa atong mga bisita nga way disiplina ang atong pedestrians. Puslan man nga atong gi- istrikto ang dagan sa mga sakyanan kinahanglang dakpon usab ang way disiplinang pedestrians.
(msr1144@yahoo.com)