MAKITA sa TV footage nga gikwelyohan ug hapit sukmaga sa “kanhi laos nga pulitiko” ang usa ka court sheriff nga maoy nag-supervise sa demolisyon sa mga panimay sa sitio San Roque ug Sta. Cruz, M. Velez st., Capitol Site, kilid sa Kapitolyo. Maisugon ang mayor nga miduol kang court sheriff Elcid Caballes samtang gipahigayon ang demolisyon. Morag kahanggabon og tawo ang mayor.
Niadto pang miaging semana gisugdan ang demolisyon pinasikad sa court order human ang miangkon nga nanag-iya sa maong luna nakadaog sa husgado. Ambot og naka-agi ba lang ang mayor o mituyo sa pag-adto aron manalipod sa mga apektadong lumolupyo pinaagi sa pagbabag sa demolisyon aron mogawas siyang bayani.
Ang mga apektadong lumolupyo nangangkon nga wa silay labot sa demolisyon gumikan kay ang gitukuran sa ilang balay government lot. Anaa sa private lot ang gipang-demolish. Pero di siguro boang ang sheriff nga magpataka og demolish kon way labot sa order.
Kon wa pa kapugngi ang mayor, morag mahitabo unta usab ang nahitabo ni Davao City Mayor Inday Sarah Duterte nga diin iyang gisukmag ang sheriff sa Davao nga nagpatuman lang usab sa demolisyon. Legal ug legitimate ang gihimo sa court sheriff kay nagpatuman ra siya sa court order. Nganong siya man ang hulgaon sa mayor? Mihulga ang mayor nga ikiha ang sheriff. Kon wa pa lagi kapugngi, masumbagan ang sheriff sa mayor. Maayo sab gani nga wala kumuta sa sheriff ang nagbukol sa kilid sa mayor. Mobuhagay unta.
Kon molaban unta ang mayor sa mga apektado, didto pa unta sa korte. Mi-interbiner unta siya sa korte. O bisan karon nga aduna nay demolition order midangop unta siya sa korte pinaagi sa pag-apply og temporary restraining order (TRO) aron kapugngan ang pag-implementar sa demolition order. Opisyal man unta pero dili mosubay og balaod. Iya unta nang huna-hunaon daan ang iyang nga aksiyon aron dili siya hisaypan. Pero unsaon nga dili man pod maminaw og tambag kay nagtuo siya nga siyay makamao. Walay respitar sa korte. Unsa man, mas labaw pa siya sa balaod?
(bobbygnalzaro@gmail.com)